Кеше Қазақстан Коммунистік Халықтық партиясынан ұсынылған Қазақстан Республикасы Президенттігіне кандидат Тұрғын Сыздықов Қостанай қаласында «Большевичка» АҚ тігін фабрикасы ұжымының өкілдерімен кездесті. Кездесу басында Тұрғын Ысқақұлы сайлауалды тұғырнамасының негізгі аспектілерін ұсынды.
Коммунистер үшін марксизм – қоршаған өмірдің өзгеруіне, қоғамдық дамудағы жаңа құбылыстар мен деректерді жинақтап, мәнін түсінумен байланысты ұдайы дамып келе жатқан жасампаз ғылым болып табылады.
Алға қойылған мақсаттарға жету үшін марксизм-ленинизм мен Қазақстан Коммунистік Халықтық партиясының бағдарламалық ұстанымдарын және оның қызметін насихаттау қажет.
Бүгін мен қазіргі заманда адамгершілік құндылықтарын өзгертетін негізгі мәселелер туралы партияның атынан мәлімдеп отырмын.
Тек коммунистер ғана емес, басқа да ірі саясаткерлердің, экономистердің, ғалымдардың пайымдауынша, батыс қоғамы әділетсіз болып табылады. Коммунистік ойларды іске асыру адам мен табиғаттың үйлесуіне септігін тигізеді.
Бүгін батыстық тұрмыс салтының кемшіліктері мәдениет саласында анық байқалады.
Қазіргі заманғы батыс қоғамы капиталистік жолдың алысқа апармайтынын көрсетіп отыр.
Заманауи әлемдегі тойымсыз тұтынушылық дегеніміз не? Бұл қолдан жасалған жалған құбылыс. Ол «өмірдің мәні – жеке бастың қамы» деген теріс тәрбие береді.
Адамгершілік құндылықтар жүйесін өмірге деген қанағатсыз көзқарас алмастырды. Бұл өскелең ұрпақты тәрбиелеуде бірқатар күрделі мәселелер туындатуда.
Батыс мәдениеті бизнеске айналды. Оның құндылықтарының басты шарты сұраныс пен ұсыныс қарым-қатынасына ғана негізделеді.
Соңғы жылдары әлемді толқытқан саяси және экономикалық дағдарыстар жиілеп кетті. Экономика мен қаржы салаларын дендеген трансұлттық корпорациялардың үстемдігі қоғамның ыдырауына алып келді.
Батыс қоғамы сүйеніп келген орта тап бірте-бірте моральдық тұрғыда азып-тозған тоғышар тұтынушыға айналып барады.
Прогресті регресс алмастырды. Адамзат осы күнге дейін жинақтап келген моральдық және мәдени құндылықтар көлеңкеге кетіп, бір мезеттік қажеттілікті қанағаттандыру басты мақсатқа айналды.
Қостанай облыстық комитетінің бірінші хатшысы А.Әлімбаев баяндағандай: «Кандидатымыздың сайлауалды штабы үгіт-насихат жұмыстарын жүргізіп, тиісті ақпараттық қызмет атқаруда.
Штабымызда 5 сенімді тұлға бар. Олар үгіт-насихат материалдарын орналастырып, халықпен кездесулер ұйымдастырумен айналысады.
Сондай-ақ, үгіт-насихат жұмысында «Қазақстан Коммунисі» газеті, партия сайты, Интернет пен әлеуметтік желілер белсенді қолданылуда.
