Көп балалы аналардың көңілінен шықты

Елбасының Жолдауын жыл сайын асыға күтеміз, әрдайым қолдаймыз. Халыққа жақсы жағдай жасалуда. Мен он бір баланың анасымын, қазіргі кезде бала күтімі бойынша декреттік демалыстамын. Балаларымның жәрдемақысын уақытында алып тұрамыз. Балаларыма қарап, олардың алдағы өмірінің жақсы болғанын қалаймын. Әсіресе, Елбасының көп балалы аналарға жасап отырған қамқорлығына ризамыз.

Елбасы өзінің «Қазақстандықтардың әл-ауқатының өсуі: табыс пен тұрмыс сапасын арттыру» Жолдауында болашаққа жол сілтейтін шамшырақ ретінде еліміздің негізгі мақсаттарын жоғалтпай, адамдардың күнделікті өмірінің мәселелерін шешуге мүмкіндік беретінін атап өтті. Бұл тұрғыда жыл сайын ел азаматтарының әл-ауқатын арттыруға ықпал жасайтындығын жеткізді. Ал, оның нәтижесі көпшіліктің көз алдында. Елбасымыздың алға қойған мақсаты – озық 30 елдің қатарына ену. Оның ішінде ұстаздарға, ғылым саласына үлкен мән беріліп отыр. Еліміздің алдыңғы қатарға қосылуы үшін білімді жастарды тәрбиелеуіміз керек.
Мені «Мұғалімнің мәртебесі туралы» Заңның пайда болуы педагогтардың мәртебесі жоғарылайтынына септігін тигізетіні қатты қуантты. Өйткені, өзімнің мамандығым да педагог-психолог болғандықтан мұғалімдердің жағдайына ұдайы назар аударылса екен деп тілеп отырушы едім. Бұл жолы сол тілегім Елбасының құлағына жеткендей болды. Енді мұғалімдер алаңсыз өздерінің кәсіби жұмыстарымен айналысатын болады. Педагогика мамандықтары бойынша оқу бітірген шәкірттер енді далада қалмайды. Мұғалім мамандығына сұраныс артады.
Сонымен қатар, ең төменгі еңбекақының 42 мың теңгеге дейін көтерілуіне де қуанбасқа болмайды. Ең бастысы білім беру және денсаулық сақтау салаларындағы жетістіктерді ауыз толтыра айтып өтуге болады. Он бір баланың анасы ретінде қазіргі кезде балаларымды балабақшаға кезекке тұрғызуға немесе дәрігердің қабылдауына жазылу үшін шапқылап барудың қажеті жоқ. Ұялы телефонның көмегімен ғана жүзеге асыруға болады.
Қазақ елінің басты байлығы – ұйыған ауызбіршілік пен ырысты ынтымақ. Ұзақ мерзімді жоспарды темірқазық еткен мемлекет болашағының мұнан да жарқын боларына нық сенемін.

Құралай ЖҰМАБЕКОВА,
«Ана үйі» қоғамдық қорының
бала асырап алу «Жанұя» облыстық
орталығының өкілі, 11 баланың анасы.

Пікір қалдыру

Міндетті өрістер таңбаланған Обязательные поля помечены *