Астанадан арнаулы тілшіміз Перизат БӨЛЕКОВА хабарлайды:
Елордадағы «Тәуелсіздік» сарайында «Нұр Отан» партиясы жанындағы «Жас Отан» жастар қанатының кезектен тыс ІІІ съезі болып өтті.
Съезге жұмысшы, ауыл жастары, спортшылар мен мәдениет саласының үздіктері, жас мәслихат депутаттары, жалпы саны 600-ден астам жасотандық қатысты.
Алдымен, 2012-2015 жылдарға арналған жұмыс нәтижесі жөнінде ұйым төрағасы Ерлан Сыдықов есеп берді. Оның айтуынша, бүгінде еліміз бойынша 170 мың жасотандық бар. Олар «Сәтті қадам», «Жастар – Отанға», «Жастар кадрлық резерві» сияқты әлеуметтік жобаларды іске асырып, қоғам өміріне белсене араласуда. Съезде «Жас Отанның» логотипін өзгерту, атқарушы хатшыларды төраға, төрайым деп атау, сондай-ақ, үйлестіру кеңесін құру, жастар қанатының 2020 жылға дейінгі бағдарламасын қабылдау, қазіргі төраға Ерлан Сыдықовты қайта сайлау жөнінде шешім қабылданды.
Жиында облыстағы жасотандықтардың атқарған жемісті жұмысы ерекше атап өтілді. Біз съезден кейін облыс делегациясы құрамында шараға келген көкшелік жас спортшы Данияр Рақымжановты сөзге тартқан едік. Оны жастар қанаты жұмысының жанданып келе жатқандығы қуантады. Делегат енді партияның бұқаралық спортты дамытуға бағытталған бағдарламаларын жүзеге асыруға атсалысуды көздеп отыр. Осы орайда, съезге 60-тан астам ақмолалық жастың қатысқандығын айта кетейік. Алдағы жоспарлар пысықталған бұл жиыннан жерлестеріміз зор сеніммен өңірге аттанды.
