«Бастау-бизнес» арқылы несие алып, дүкен ашты

Степняк қаласындағы «Первомайка» шағын ауданында аралас тауарлар дүкені ашылды. Бір қарағанда қатардағы шара сияқты көрінгенімен,

бұл нысанның қатарға қосылуы ауыл тұрғындары үшін елеулі оқиға саналады. Бұл шараға аудан әкімі Ермек Нұғымановтың арнайы қатысып, құттықтау сөз арнауында да мән жатыр.

– «Первомайкада» жүз отбасынан астам кісі тұрады, – деді Ермек Бекенұлы. Әйткенмен, жылдар бойы жергілікті дүкеннің болмауы көптеген қолайсыздық тудырып келді. Барлық дүкендер аудан орталығында орналасқан. Күнделікті қажетті тауарларды сатып алу үшін тұрғындар 3-5 шақырым жол жүреді. Осынау игілікті істі кәсіпкерліктегі алғашқы қадамын бастаған Сағидолла Омаровтың қолға алғаны қуанышты. Бұл өзгелерге де үлгі салар ұмтылыс болғай.
Сағидолла Омаров дүкеннің сәулетіне, тауарлардың түрлеріне және бұларды көз тартарлық етіп орналастырудың тәртібіне мән беретіні көрініп тұр. Мұны жергілікті азаматтың «Бастау-бизнес» бағдарламасы бойынша білімін жетілдіріп, кәсіпкерлік сырына қаныға түскенімен байланыстырған жөн. Сондай-ақ, оның бизнес жобасы ауыл шаруашылығын қолдау Қорында мақұлданып, несие қаржысы беріліп отыр. Өз ісіне құлшына кіріскен С.Омаровтың қысқа мерзімде дүкен тұрғызғаны кәсіпкердің болашаққа арналған жоспарларының да ауқымдылығын аңғартады.
Жалпы, ауданда кәсіпкерлік қозғалыс белсенді сипат алғанын айту ләзім. 2018 жылдың жартыжылдығының өзінде жұмысын жаңа бастаған 42 кәсіпкерге 122 миллион теңге көлемінде несие қаржысы бөлініпті. Былтырғы сәйкес мерзімде бұл көрсеткіш 86 миллион теңге болған. Сондай-ақ, биыл аудандық жұмыспен қамту және әлеуметтік бағдарламалар бөлімі арқылы 120 адамның «Атамекен» кәсіпкерлер палатасындағы курста оқығаны кәсіпкерлік қозғалыстың жандана түскенін білдіреді.

Төлеген Қосшығұлов.

Біржан сал ауданы.

Пікір қалдыру

Міндетті өрістер таңбаланған Обязательные поля помечены *