Орта жүздің ханы – Абылай ханның екінші әйелі Сайман ханымнан туған Уәли ханның мазары Көкшетау қаласынан таяқтастам жердегі
Қазақстан ауылының маңында. Хан мазары 2008 жылы туғанына 270 жыл толуына орай тұрғызылған болатын.
Биыл «Азия Агрохим» жауапкершілігі шектеулі серіктестігінің директоры Борис Козловтың демеушілігінің арқасында мазардың маңайы әдемілеп қоршалды, төбе басына жиектей көтерілетін жол салынды. Мазарға келіп мінәжат еткен адамдар жайғасып, демалатын орнықты орындықтар қойылды. Мазар төңірегі абаттандырылып, тап-тұйнақтай етіліп тазаланып, көркейіп қалды.
–Бұрын мазар салынбай тұрғанда ханның алтын-күмісін іздеген әлдекімдер талай рет қазып, берекесін кетірген екен,–дейді Борис Козлов, – енді, міне Көкшетауға ат ізін салған, ел тарихын етене білгісі келетін адамдардың ат басын бұратын жеріне айналып отыр. Хан мазары қараусыз қалса, кейінгіге сын емес пе?
Серіктестік басшысының аталы сөзі жерде қалмады. Жақсы ісі жалғасын тауып, іле ағаш отырғызу жұмыстары жүргізілді. Оған Көкшенің ақсақалдары, Уәли ханның өз ұрпақтары, Науан хазірет атындағы облыстық мешіттің, облыстық тарихи-өлкетану музейінің ұжымдары атсалысты.
Қазір хан иеміз мәңгілік тыныстаған қорым басы көпкөрім жақсарып қалды.
Байқал БАЙӘДІЛОВ.
