Елбасы Н.Назарбаевтың «Ұлы даланың жеті қыры» мақаласы рухани әртараптанып, ұлттық тарихи құндылықтар мен жаһандандыруды мақсат тұтқан жасанды мәдениеттердің ара-жігін ажырата алмайтын деңгейге жеткен қазіргі кездегі адамдардың санасын серпілтіп, рухын жаңғырту үшін жасалған құнды мақала екені даусыз.
Әрбір елдің, әрбір ұлттың тарих сахнасында тек қана өзіндік бет-бейнесімен қалатыны белгілі. Мысыр туралы айтқымыз келсе Пирамида, қағаз туралы айтқымыз келсе Қытай, қайта өрлеу мәдениеті туралы болса Италия есімізге түседі. Елбасының көздеп отырғаны да дәл осындай ұлттық-мәдени даралықты насихаттау. Әлемдік өркениетте айрықша орын алған біздің мақтан тұтатын мәдени жетістіктерімізді санамалап айтып бергені де өткен жылы жарияланған «Болашаққа бағдар: рухани жаңғыру» мақаласында айтылған ұлттық кодтарымыз осылар болады дегенді айтып отыр.
Атқа міну мәдениетіне байланысты ойлап табылған бір ғана шалбардың өзі тұрмыстық мәдениеттегі өлшеусіз жетістік болды. Біздің ата-бабаларымыз шалбар киіп жүрген кезде ежелгі өркениеттің отаны болып саналатын елдерде басынан аяғына дейін матаға оранып жүргені жасырын емес. Ұлы даланың адамзат тарихына қосқан көптеген жаңалықтары мен жетістіктері «Барлық мәдениет батыстан» деген еуроцентристік көзқарастың кесірінен әдейі айтылмай келгені рас. Аталған мақалада Елбасы біздің мақтан тұтар заттарымыз бен құндылықтарымыз мынау болады деп көрсетіп берді. Өркениетке барар жолда әркім өзіндік бет-бейнесі мен ерекшелігімен дараланатынын айтып берді. Елбасының бізге айтар ойы – төл тарихыңды таны, бағалайтын құндылықтарыңды біл, оларды өркениет жағдайына сәйкес мақтан тұт, санаңды жаңғырт дегенге саяды.
Қайырым КАБАР,
Степногорск қалалық оқыту-әдістемелік
орталығының директоры.
