Астаналық ауданның әлеуеті зор

Кеше облыс әкімі Мәлік Мырзалин кезекті жұмыс сапарымен Целиноград ауданында болып, бірқатар әлеуметтік нысандардың жұмысымен танысты. Сондай-ақ, аудан әкімі Мәлгаждар Тәткеевтің өңірдің 2018 жылғы әлеуметтік-экономикалық дамуының қорытындылары және биылғы жылдың жоспарлары туралы тұрғындар алдындағы есеп беру кездесуіне қатысып, алда тұрған келелі міндеттерді белгіледі. Кездесуге Қазақстан Республикасы Президент Әкiмшiлiгiнiң мемлекеттiк инспекторы Қалдыбек Бәйiмбетов қатысты.

Облыс әкімі алдымен аудан орталығы – Ақмол ауылындағы «Мейірім» әлеуметтік дүкенінде болды. «Мейірім» серіктестігінің директоры, Целиноград ауданындағы «Болашақ» мүмкіндігі шектеулі жандардың қоғамдық бірлестігінің төрағасы Амангелді Қапановтың айтуынша, мұнда əлеуметтік жағынан аз қамтылған тұрғындарға аптасына бір рет азық-түлік өнімдері тегін таратылып беріледі.
– Алдағы уақытта дүкен маңынан дəріхана ашу жоспарда бар. Онда да мұқтаж жандарға дəрі-дəрмек жеңілдетілген бағамен босатылатын болады, – дейді кəсіпкер.
Облыс басшысы бұдан кейін аудандық мәдениет үйінің фойесінде ұйымдастырылған көрме павильонын аралап көріп, аудан әкімінің есепті кездесуіне қатысты. Кездесуде аудан әкімі жиналғандардың назарын Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы мен «Ұлы даланың жеті қыры» мақаласында айтылған міндеттерге аударды.
– Елбасының Жолдауындағы алдымызға қойылған міндеттерді орындау өңіріміздің дамуына үлкен серпін береді. Жолдау еліміздің 2050 жылға қарай әлемнің дамыған 30 елінің қатарынан орын алу мақсатын алға тартады. Жолдауда алға қойылған міндеттерді орындауға астаналық ауданның да қосып келе жатқан үлесі зор. Аудан 2018 жылды жақсы көрсеткіштермен және үдемелі қарқынмен аяқтады, – деді Мәлгаждар Тәткеев.
Аудан әкімінің айтуынша, өңірде Индус-трияландыру картасы жобаларын жүзеге асыру есебінен өнеркәсіп жедел қарқынмен дамып келеді. Мәселен, 2018 жылы Индустрияландыру картасына үш жоба енгізілген. Нақтырақ айтсақ, «Құмтас АКК» серіктестігінің құны 300 миллион теңге болатын бетон және бетон өнімдерін шығаратын зауыт, «Сыдықбек» серіктестігінің 958 миллион теңгені құрайтын сүт және сүт өнімдерін өңдейтін кешені және «Astana Ceramic» серіктестігің 3,8 миллиард теңгенің керамикалық тастар мен блоктар шығаратын зауытының құрылыстары бар.
Елбасының сапалы өнімдері шығаратын бәсекелестікке сай кәсіпорындар ашу туралы тапсырмасын орындау мақсатында Қабанбай батыр ауылында «Astana Ceramic» серіктестігі керамикалық тастар шығаратын зауытын және Қосшы ауылында «KAZYNA-SR»
серіктестігі шиһаз цехын ашты.
Жалпы, 2018 жылы «Жол картасы» бо-йынша құны 8,1 миллиард теңге болатын 14 жоба жүзеге асырылған. Биылғы жылы да бірқатар жобаларды жүзеге асыру жоспарда бар.
Ауданда ауыл шаруашылығын дамыту шаралары да ойдағыдай жүзеге асырылуда. Өткен жылы ауданның ауыл еңбеккерлері өндірген ауыл шаруашылығы өнімдерінің көлемі 30,8 миллиард теңгені құрады. Бұл көрсеткіш оның алдындағы жылмен салыстырғанда біршама жоғары. 2018 жылдың күзінде аудан диқандары 281 мың тонна астық жинап, қамбаға құйып алды. Сонымен қатар, мал басы да өсіп келеді.
– Ең бастысы, ауданда Астананың азық-түлік белдеуін жасау бағдарламасы бойынша оң көрсеткіштерге қол жеткізілді. Бұл әрине, астаналық аудан үшін өте маңызды, – деді Мәлгаждар Тәткеев.
Сонымен қатар, аудан әкімі өңірде цифр-ландыру мәселесіне ерекше көңіл бөлініп отырылғандығын атап өтті. Аудандағы «Астана-Өнiм» акционерлік қоғамы мен «Родина» серіктестігі толық цифрландырылған. Ал, «Ақмола-Феникс» акционерлік қоғамы нақтылы егіншілік технологиясын енгізіп отыр. Qoldau.kz электронды картасын қалыптастыру, жайлымдар мен шабындық жерлерді цифрландыру бойынша жұмыстар жүргізілуде.
Экономикада алатын үлес салмағы жыл санап артып келе жатқан шағын және орта бизнес те өңірде жақсы дамуда. Сапалы білім мен медициналық қызмет көрсетуді қамтамасыз ететін әлеуметтік инфрақұрылымдардың жағдайын жақсарту бағытында да айтарлықтай жұмыстар атқарылуда. Әсіресе, білім беру саласына ерекше көңіл бөлінуде.
Осы орайда, аудан әкімі мектепке дейінгі оқу-тәрбие жүйесін кеңейту бағытында біраз шаруалардың атқарылғанын атап өтті. 2018 жылы Ақмол ауылындағы орта мектепте ІТ сынып ашылды. Өткен жылы Отаутүскен және Қаражар ауылдарында жаңа мектептер пайдалануға берілді. Максимовка және Қажымұқан ауылдарында 300 оқушыға арналған, Қоянды ауылында 1200 орындық мектептің құрылысы жүргізілуде. Бұдан бөлек, Ақмол, Раздольное, Тастақ, Жаңажол, Бірлік, Өтеміс және Семеновка ауылдарында да жаңа мектептердің жобалық-сметалық құжаттамалары қолға алынған.
Тұрғын үй құрылысы жұмыстарын жүргізуде де жетістіктер жоқ емес. Өткен жылы 176,6 мың шаршы метр тұрғын үй алаңы пайдалануға берілген. Баспана салуда жылдық жоспар алдыңғы жылмен салыстырғанда 22 пайызға асыра орындалған. «Нұрлы жер» және «7-20-25» бағдарламалары ойдағыдай жүзеге асырылуда. Ауданда жол, инженерлік коммуникация, электр желісі, сумен қамтамасыз ету бағытында да ауқымды шаруалар атқарылған.
– Биылғы жылы облыс әкімінің тапсырмасына орай «Ақмола Нұрлы жер» серіктестігі мемлекеттік кәсіпорны құрылды. Ақмол
ауылында инженерлік желілер құрылысы мен абаттандыру жұмыстары басталды, – деді Мәлгаждар Тәткеев.
Кездесуде жиналған жұртшылық арасынан шығып сөйлегендер аудандық әкімдік тарапынан жүргізіліп жатқан жұмыстарға оң бағасын беріп, өздерін толғандырып жүрген сауалдарын қойды, сондай-ақ, көтерілген проблемаларға байланысты тұшымды жауаптар алды. Қойылған сауалдардың арасында жол, жылу жəне ауданды газдандыру мәселесі бар. Бұл бағытта Қоянды, Малотимофеевка және Шұбар ауылдарында газ тарату желісін салу үшін жобалық-сметалық құжаттамалар әзірленуде. Осы бағытта облыстық бюджеттен 143,6 миллион теңге қарастырылып отырған көрінеді.
Жалпы алғанда, Астана агломерациясына кіретін ауданда атқарылып жатқан істер ауқымы мол. Дегенмен, кейбір олқы тұстардың да бар екені жасырын емес. Әсіресе, жол, су мәселелерін шешу бо-йынша әлі де кешенді түрде жұмыс істеуге тура келеді.
Жиынды қорытындылаған облыс әкімі Мəлік Мырзалин Астананың іргесіндегі Целиноград ауданының əлеуеті зор екенін айта келе, қайта өңдеу кәсіпорындарын көбірек ашуды жəне салық кірісін арттыруды тапсырды.
– Ауданның əлеуеті мол. Оны соңғы жылдардағы əлеуметтік-экономикалық даму көрсеткішінен анық байқауға болады. Бүгінгі айтылған көрсеткіштер жай ғана сандар емес. Онда ауданның əр тұрғынының қосып отырған үлесі бар. Елбасының тапсырмасымен астаналық ауданға жыл сайын қомақты қаржы бөлініп келеді. Биылғы жылы кешендік жоспар бойынша республикалық бюджеттен 8 миллиард теңге қаржы қарастырылған. Жалпы, ауданға көп қаржы бөлініп отыр, дегенмен де өңірде сол мол қаржының толық қайтарымын беру барысында олқылықтар бар. Сондықтан, ауданның əлеуметтік-экономикалық даму көрсеткішін одан әрі арттырып, халықтың əл-ауқатын жақсарту бойынша бүгінгі айтылған жоспарлар мен жобаларды жүзеге асыру қажет. Осы орайда, қайта өңдеу кәсіпорындарын көптеп ашу жəне салық кірісін арттыруға жете көңіл бөлінуі тиіс, – деді облыс әкімі өз сөзінде.

Аслан ОСПАНОВ,
«Арқа ажарының» өз тілшісі.
Суретті түсірген Берік ЕСКЕНОВ.

Пікір қалдыру

Міндетті өрістер таңбаланған Обязательные поля помечены *