Көтерілген орынды мәселелердің бәрі де назарда ұсталады

Кеше аудандық мәдениет үйінде өткен аудан әкімінің халық алдындағы есебіне халық көп жиналды. Атбасар ауданының әкімі Аманбек Қалжанов «2018 жылдың қорытындылары» туралы баяндап, биылғы жылғы атқарылатын жұмыстарға да тоқталды. Кездесуге облыс әкімінің орынбасары Василий Крылов қатысты.

Атбасар ауыл шаруашылығы мен өнеркәсібі қатар дамыған облыстағы іргелі аудандардың бірі. Аудан әкімінің айтуына қарағанда, өңір өткен жылды жақсы табыстармен аяқтаған. Өнеркәсіп саласындағы өсім 106,7 пайызды құраса, ауыл шаруашылығы саласы жылды 100,1 пайыз көрсеткішпен қорытындылаған. Ең қарқынды дамыған сала – құрылыс. Бұл саланың өсімі бұрынғы жылдармен салыстырғанда 3,5 есеге артқан. Негізгі капиталға салынған инвестиция көлемі 7 миллиард теңгеден асып жығылады.
Ауданда адамдардың орташа жалақы деңгейі 109,5 мың теңгені құрап, 2017 жылмен салыстырғанда 6,1 пайызға өскен.
Тыңмен бірге түлеген Атбасар ауданы негізінен аграрлық өңір болып саналады. 2018 жылы аудан 30 миллиард теңгенің ауыл шаруашылығы өнімдерін өндірген. Сөйтіп, көрсеткіш 2017 жылмен салыстырғанда 102 пайыз болған. Аудан диқандары егін орағын қысқа мерзім ішінде табысты аяқтады. 493 мың тонна дәнді және бұршақ дақылдары жинап алынды. Гектар түсімі 12,5 центнерден айналды. Сонымен бірге, аудан шаруашылықтары 15 мың тонна майлы дақылдар жинап алды. Гектар түсімі 7,6 центнерден айналып, 2017 жылмен салыстырғанда 2,2 мың тонна артық өнім жиналды. Техника паркін жаңғырту мәселесіне де жете көңіл бөлінеді. Өткен жылы шаруашылықтар 1 миллиард 300 миллион теңгеге 16 трактор, 16 комбайн мен 4 егіншілік кешенін сатып алды.
Биылғы жылы ауданда 7 миллиард теңгенің 11 инвестициялық жобасы жүзеге асырылмақшы. Оның ішінде, «Бастау» ЖШС-і қолға алған 1200 басқа арналған тауарлы-сүт фермасының құрылысы, «Атбасар-Қазына» ауыл шаруашылығы өндірістік кооперативінің 400 басқа арналған бордақылау алаңы, «Интер-Трайд» серіктестігінің жылына 11,5 миллион дана жұмыртқа өндіретін құс фабрикасы бар.
Мемлекеттік бюджетке салық түсімдері өткен жылы 2 миллиард 860 миллион теңгеге жетіп, болжамданған жоспар 104,6 пайызға орындалған. Сөйтіп, республикалық бюджет түсімі 104,6 пайызға орындалып, 636 миллион теңге артық түсім түскен. Жергілікті бюджет түсімі көлемі де көңілден шығатындай деңгейде. Жалпы көлемі 2 миллиард 224 миллион теңге түсім жиналып, болжамданған жоспар 101,1 пайызға орындалған.
Аудан әкімі 2018 жылғы халық алдындағы есеп беру жиынында жұртшылық тарапынан көтерілген мәселелер бойынша атқарылған жұмыстарға да тоқталып өтті. Өткен жылғы Атбасар қаласы тұрғындарын алаңдатқан ең маңызды мәселе – орын алған табиғат апатына байланысты баспанасыз қалғандарды үймен қамтамасыз ету жайы болатын. 2018 жылдың 30 қарашасында қалада 45 пәтерлі екі жаңа тұрғын үй пайдалануға беріліп, оған су тасқынынан зардап шеккен отбасылары қоныстанды. Айта кету керек, өткен жылы ауданда 30 мың шаршы метр тұрғын үй салынып, пайдалануға берілген. Соның арқасында 300-ден астам отбасы тұрғын үй жағдайларын жақсартуға мүмкіндік алды. Атбасар қаласының өзінде 45 пәтерлі 8 үй салыну жоспарланып отыр. Өткен жылы 90 отбасы баспаналы болса, биылғы жылдың бірінші тоқсанында тағы бір 45 пәтерлі үй пайдалануға беріледі. Жаңа пәтер, ең алдымен су тасқынынан зардап шеккендерге берілуде.
Сондай-ақ, өткен жылғы жиында тұрғындар тарапынан көтерілген тағы бір мәселе шешімін тауып, Родионов орта мектебі үшін жаңа қазандық сатып алынып, орнатылды. Атбасар қаласында жалпы көлемі 9,5 мың шарты метр көше жолдарына ағымдағы жөндеу жұмыстары жүргізіліп, осы мақсатқа 35 миллион теңге бөлінді. Қала орталығындағы көптен жөндеу көрмеген Л.Белаш, Б.Момышұлы, К.Әмірова, Перевалочная және Набережная көшелері жөнделіп, жол бойы абаттандырылды. 2018 жылы Покровка селосында су желілерін тарту жұмыстары басталды. Бұл жұмыс биылғы жылдың соңына қарай аяқталуы тиіс. Осы мақсат үшін бюджеттен 164 миллион теңге қарастырылып отыр. Аудан әкімінің айтуынша, өткен жылы жұртшылық тарапынан көтерілген 5 мәселеге байланысты мақсатты жұмыстар жүргізіліп, атқарылған жұмыс жөнінде аудандық газетте тұрғындарды тұрақты хабардар етіп отырған.
Аудан әкімінің атқарған жұмыстары жұртшылық тарапынан оң қабылданды. Ол сөйлеп, пікір білдірушілердің айтқандарынан байқалды. Жекелеген тұрғындар тарапынан өздерін толғандыратын мәселелер де көтерілді. Оның бәрі хаттамаға жазылып, алдағы уақытта назарға алынбақ.
Қалкөз ЖҮСІП,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *