«Ұлтқа өнеге болған асыл аналар!»

Ақмола облыстық Науан хазірет атындағы мешіт жанынан құрылған «Ізгі аналар» қыз-келіншектер мектебінің ұйымдастыруымен

Елбасының «Рухани жаңғыру» және «Ұлы даланың жеті қыры» мақалаларын өскелең ұрпақ арасында кеңінен насихаттау мақсатында «Ұлтқа өнеге болған асыл аналар!» атты рухани-танымдық іс-шара болып өтті.

Шараның мақсаты – қазақтың ұлы тұлғаларын өмірге әкелген аналар мен оларға өнеге берген әжелер және тарихта есімі қалған әйел тұлғалар жайлы танымдық-тағылымдық ақпараттарды ортаға салу еді. Осы арқылы жас қыздарға өткен тарихтың көмескі беттерін парақтай отырып, жаңа заманның тұлғаларын тәрбиелеудің маңызын түсіндіру шараның басты арқауына айналды.
Рухани кеш шымылдығы Абайдай ұлы дананы бала кезінен тәрбиелеп, ұлттың анасына айналған – Зере әжеміз жайлы қойылыммен ашылды. Оның бейнесін Алтынай Есенәлиева сомдады.
Одан әрі қазақ аспанында құйрықты жұлдыздай жарқ еткен Шоқанға өнеге берген Айғаным анамыз туралы дерекнамамен жалғасын тапты. Сол сәт сахнаға Бопай ханым шықты. Кешегі қазақтың азаттығы жолында Кенесары ханмен иық тіресіп, жауға қарсы шыққан Бопай есімі ерлік пен батырлықтың символындай айшықталады. Оның бейнесін әсерлі етіп жеткізіп, өмірінің өнегелі тұстарын зерделеген «Ізгі аналар» мектебінің мүшелері Айгүл Жұмабекова және Бақытгүл Аужанованың қойылымдары да сәтті көрініс тапты. Ал, Күнімжан, Домалақ аналарымыздың даналығы мен даралығын да тарихи деректермен ұсынған «Ізгі аналар» мектебінің мүшелері салиқалы ойға негізделген көрсетілімді ұсынды. Бұл терең мағыналы көрсетілімдердің арасында сергіту сәті ретінде ұмытылып кеткен қазақтың ұлттық ойындары: «Бес асық», «Білек сынасу» сайыстары ұйымдастырылды. Аналарымыз қазақтың ұлттық киімі мен кимешектерін киіп келіп, жастарды тамсандырып, арнайы келген қонақтар ұлттық сусындар мен тағамдардан дәм татты.
Шара соңында сайысқа қатысқан жеңімпаздарға кішігірім сыйлықтар үлестіріліп, «Ізгі аналар» мектебінің белсенді мүшелеріне «Асыл аналар» кітабы табыс етілді. Мазмұнды шараның ұйымдастырылуына ұйытқы болған мешіт ұстаздары Махаббат Халикова мен Ғалия Ыбраеваларға қатысушылардың ризашылығы шексіз болды.

Асылай ҚАДЫРҚЫЗЫ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *