Билік пен халық ынтымақтастығының жемісі

Қорғалжын ауданының әкімі Бауыржан Ғайса мәдениет үйіндегі тұрғындармен кездесуде «2018 жылдың қорытындылары және 2019 жылға белгіленген міндеттер туралы» есеп берді. Кездесуге облыс әкімінің орынбасары Айна Мысырәлімова қатысып, сөз сөйледі.

Қорғалжын ауданында 2018 жылы барлық деңгейдегі әкімдердің тұрғындармен 23 есепті кездесуі өткізілді. Жылдың басты жиындарына 2723 адам қатысып, 88 кісі мінберге көтерілген. Олардың тарапынан 27 ұсыныс-пікірлер айтылса, мұның 25-іне қолма-қол түсінік беріліпті. Жалпы, аталған шаралардың қорытындысымен аудан әкімі Бауыржан Ғайсаның арнайы өкімі шығарылып, тұрғындар ескертпесі мен ұсыныстары бақылауға алынған.
Бүгінгі есепті кездесудің белсенділікпен өткізілуінің басты сыры осында деп білдік. Аудан әкімі Бауыржан Ғайсаның баяндамасы барысында жиналғандар тарапынан аракідік қол шапалақталып тұруы осыны аңғартады. Қол соғылуының жөні де бар сияқты.
– Аудан экономикасының барлық саласында оң өсім бар, – деді аудан әкімі. Өткен жылы негізгі капиталға 2,5 миллиард теңге инвестиция бағытталды. Өңірде 992,3 миллион теңгенің құрылыс жұмыстары жүргізілсе, мұның 363,6 миллион теңгесі тұрғын үй құрылысының үлесінде.
Қорғалжын – негізінен ауыл шаруашылық ауданы. Әкім баяндамасының ауқымды бөлігін осы салаға арнауы сондықтан. Диқандар 2018 жылы 119,080 мың гектарға ауыл шаруашылығы дақылдарын орналастырса, мұның 95,2 пайызы дәнді және бұршақ дақылдары екен. Шаруалар гектар түсімділігін 11,4 центнерге жеткізіп, 128,2 мың тонна астық бастырды. Егістік алқапты әртараптандырудың қайтарымы да жоғары екендігіне нақты деректер келтірілді.
Агрокәсіпорындардың «Сыбаға», «Алтын асық», «Құлан» сияқты мемлекеттік бағдарламаларға белсенділікпен қатысуы мал шаруашылығына 61,1 миллион теңге субсидия бөлінуіне мүмкіндік жасаған. Осының өзі барлық түлік бойынша мал басының артқандығын көрсетеді.
Әкім осы ретте 47498 гектар ауыл шаруашылық жердің тиімсіз пайдаланылатынын, мұның 15438 гектары егістік, 26832 гектары жайылымдық алқап екендігін ескертіп өтті. Қолданылған шаралардың нәтижесінде 12400 гектар алқап айналымға қосылған.
Үдемелі индустриялық-инновациялық даму бағдарламасы шеңберінде құрылған «Бакара» ет өңдеу кешені экспорттық бағыт ұстанса, Сабынды ауылындағы «Мет-777» ЖШС жылыжайы жергілікті 15 тұрғынды жұмыспен қамтыды, ал, алкогольсіз сусындар шығаратын «GreenProducts» ЖШС жылына 5 миллион шыны өнім шығару қуатына ие. Ауданда шағын және орта бизнес қуаттанып қалғандығы қуантады. Мемлекеттік-жекеменшіктік әріптестік аясының кеңігеніне де ілтипатты мысалдар келтірілді.
Ұлттық рух ұстанымы берік Қорғалжын ауданында «Мәңгілік Ел», «Рухани жаңғыру», «Ұлы даланың жеті қыры», «Әлеуметтік бес бастама», «Ауыл – алтын бесік» сияқты президенттік бастамалар қоғамдық үрдістің қуатты қозғаушы күшіне айналғаны ғанибет. Мұның барлығы уақыт алға тартқан маңызды міндеттермен өзектес өрбіп отырғаны баяндамада кеңінен көрініс тапты. Бұл орайда киелі жерлер Картасының ауқымы кеңіп, атқарылған шаралардың мазмұны байытылғаны, «Цифрлық Қазақстан» бағдарламасының өмір сапасын жақсартуға септескендігі, білім мен денсаулық саласында игі жаңалықтардың орнығуы, кепілдендірілген әлеуметтік көмектің шарапаты айқын аңғарылады. Баяндамада тұрғындарға қызмет көрсету Орталығы, «Электронды үкімет» веб-порталы, ақпараттық орталық, «Е-лицензиялау» мемлекеттік дерек қоры арқылы 6000-ға жуық қызмет көрсетілгені де айтылды.
«Жастар жылының» жариялануы аудандағы жастар саясатын дамытуға серпін беретіні күмәнсіз. Жастар саясатын өркендетуге аудандық бюджеттен 2018 жылы 7761000 теңге қаржы бөлініп, жоспарлы тапсырмалар толық орындалыпты. Мемлекеттік әлеуметтік тапсырыстар көлемінің өсуі аудан жастарының белсенділігін байқатады. «Дипломмен – ауылға!» бастамасымен өңірге әртүрлі саланың 45 жас маманы келген. Бұл мақсатқа 133478,0 мың теңге қаржы қарастырылып, 45 жас маманға банктік несиелер бөлініпті. Сондай-ақ, көші-қон қаржысы, түрлі өтемақылар да қарастырылған.
– Қозғалыс үстіндегі тіршілік табысқа бастайды. Қол жеткен табыстарымыз көз алдарыңызда. Осының өзі біздің биылғы жылы да биік белестерден көрінетіндігімізге сенім қалыптастырады, – деген аудан әкімі Бауыржан Ғайса баяндамасының соңында залдан қойылған сұрақтарға жауап қайтарды.
Бақберген Амалбеков,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *