Құрылыс қарқын алып, инвестиция көлемі артуда

Жылдағы дәстүр бойынша Жарқайың ауданында облыс әкімінің орынбасары Марат Иғалиевтің қатысуымен аудан әкімі Мұрат Балпанның өткен жылы атқарылған жұмыс қорытындылары мен биылға белгіленген міндеттер туралы халық алдындағы есеп беру кездесуі болып өтті.

Елбасының Қазақстан халқына арнаған «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы халықтың экономикалық тұрақтылығы мен әлеуметтік әл-ауқатын қамтамасыз етуді көздесе, «Ұлы даланың жеті қыры» атты бағдарламалық мақаласы ұлттық патриотизмді және оның тарихын, мәдениеті мен адамдарына деген құрмет сезімін қалыптастыруға бағытталған. Бүгінде аудан тұрғындары Елбасының жыл сайынғы Жолдауларымен, бағдарламалық мақалаларына сүйеніп, елдің экономикалық және әлеуметтік дамуы жолындағы тұрақтылықты сақтай отырып, сеніммен алға қадам басып келеді. Ауданда қаңтар айында ауыл әкімдерінің 25 есеп беру кездесулері өткізіліп, оған жарқайыңдықтардың 2581 тұрғыны қатысқан.
– Аудандық бюджет 100 пайызға орындалды, осылайша аудан облыстық рейтингте табыс бөлігін орындау бойынша бесінші орынға ие болды. Мемлекеттік бюджетке салықтық түсімдер мен басқа да міндетті төлемдер 1,5 миллиард теңгені немесе 105,0 пайызды құрады. Аудандық бюджет 506 миллион теңге немесе 108,5 пайызға өсіп отыр. Жергілікті бюджеттегі кірістердің артуы қосымша резервтерді орындау арқылы қамтамасыз етіледі. Өткен жылы жалақыны арттыру жөніндегі жұмыс тобының 47 отырысы өткізіліп, онда 121 субъекті тыңдалған болатын. Осы жұмыстың нәтижесінде табыс көзі 41,1 миллион теңгеге өсіп, 17,3 миллион теңге қосымша салық түсті. Бұл бағытта жұмыс ерекше бақылауда және ол ағымдағы жылы да жалғасатын болады, – деді, аудан әкімі.
Ауданда экономикалық өсу қарқынына әсер ететін маңызды факторлардың бірі – инвестициялар тартудың жаңа тәсілдерін қалыптастыру. Осы бағытта өңірде 4 ірі инвестициялық жоба іске асырылды, оның ішінде: қуаты 30 мың тонна болатын «Хлебная нива» астық элеваторы салынды, «KS Invest» элеваторы жаңартылып, қуаттылығы 9-дан 30 мың тоннаға дейін артты, Пригородное ауылында 200 басқа арналған сүт фермасының құрылысы аяқталды. Құмсуат ауылында қуаттылығы 2000 тонналық көкөніс сақтауға арналған қойма салынды. Нәтижесінде аудан экономикасына 4,7 миллиард теңге инвестиция тартылды.
Сонымен бірге, бес инвестициялық жобаны жүзеге асыру қолға алынуда. Соның ішінде екі элеватор құрылысы, Отрадное ауылында 200 басқа арналған бордақылау алаңын салу, Тасөткел
ауылында сүт фермасын жаңғырту және Державинск қаласындағы балалар ойын-сауық орталығын ашу жобалары бар.
Ал, биылғы жылы ауданның жоғары инвестициялық әлеуетін толық пайдалану міндеті тұр. Жалпы, ауданда құрылыс индустриясы тұрақты даму үстінде. Қазіргі уақытта тұрғын үй құрылысы қарқын алып, ауыл шаруашылығы құрылыстары белсенді жүргізілуде, бұл ауданды дамытуға арналған бірден-бір басымдық болып табылады. Құрылыс жұмыстарының көлемі 2,4 миллиард теңгені құрап отыр. Бұл 2017 жылмен салыстырғанда 114 пайыз. Жеке тұрғын үй салу да жалғасуда. Өткен жылы 2045 шаршы метр үй салынып, 21 пайызға артып отыр. Тұрғын үй құрылысына 174,0 миллион теңге инвестиция тартылды. Ал, 2017 жылы – 161,3 миллион теңге болатын.
2019 жылы аудан орталығында тұрғын үйді жаңғырту жұмыстары жалғасатын болады, Молодежный ықшам ауданындағы 75 көппәтерлі тұрғын үйді қалпына келтірудің бірінші кезеңіне республикалық бюджеттен 100 миллион теңге бөлініп отыр, – деп атап көрсетті аудан әкімі.
«7-20-25» мемлекеттік бағдарламасы бойынша мемлекеттік-жекеменшік әріптестік шеңберінде «Молодежный» ықша мауданында 60 көппәтерлі тұрғын үйді қайта жаңғыртуға инвесторларды тарту жұмыстары жүргізілуде.
Экономиканың нақты секторында өнеркәсіптік кәсіпорындар 2,5 миллиард теңгеден астам өнім шығарды. Физикалық көлем индексі 100,1 пайызды құрады. Өндірістің өсуінде «Арка-К» серіктестігі 30 пайызды, «Коммунсервис» 20 пайызды, «Стройтехресурс» серіктестігі 15 пайызды қамтамасыз етті.
Цифрлық технологияларды пайдалануға жете көңіл бөлінуде. Егіншіліктің озық технологияларын пайдалану негізінде ауа райына тәуелді болмай бітік егін өсіруге болады.
Бүгінгі таңда 640 мың гектар егістік жер, 198 мың гектар жайылым, 5,3 мың гектардан астам шабындық жер цифрландырылған. Биылғы жылдың бірінші тоқсанында ауыл шаруашылығы басқармасына, ауылдық округтер мен ауылдық округтер әкімдеріне жайылымдарды және шабындық жерлерді цифрлауды аяқтау тапсырылды.
Міне, аудан әкімінің есептік кездесуінде баяндалған өткен жылы атқарылған жұмыстардың нәтижесі жұртшылық көңілінен шықты. Аудан әкімі тұрғындар тарапынан қойылған сұрақтарға нақты жауап беріп, көтерілген мәселелердің бәрі назарға алынатынын мәлімдеді.
Асылай ҚАДЫРҚЫЗЫ.
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *