Өнеркәсіп саласы да қарқынды дамып келеді

Шортанды ауданының әкімі Гүлнұр Сәдуақасова өткен жылғы атқарылған жұмыс қорытындылары мен биылғы жылы жоспарланған шаруалар туралы халық алдында есеп берді. Кездесуге облыс әкімінің орынбасары Асқарбек Үйсімбаев қатысты.

Астананың іргесінде орналасқан аудан аграрлық өңір болса да, соңғы жылдарда өнеркәсіп саласы да қарқынды дамып келеді. Аудан әкімінің айтуынша, 2018 жылы 31,1 миллиард теңгенің өнеркәсіп өнімдері өндірілген. Сөйтіп, өнеркәсіп өнімдерінің көлемі 2017 жылмен салыстырғанда 12,5 миллиард теңгеге артқан. Бұл саладағы мұндай қарқынды өсу өңдеуші кәсіпорындардың іске қосылуымен байланысты жүзеге асқандығын атап өткен жөн. Өткен жылы ауыл шаруашылығы өнімдерін өңдейтін кәсіпорындар 26,4 миллиард теңгенің өнімін шығарса, тау-кен өндірісі саласы 3,8 миллиард теңгенің өнімін өндірген. Өнеркәсiп бойынша нақты көлем индексi 156,1 пайызды құрап, Ақмола облысы аудандарының рейтингiсiнде бiрiншi орыннан көрінді. Облыстың өнеркәсіп саласы бойынша өнім көлемі жөнінен Шортанды ауданы төртінші сатыдан орын алып отыр. Осы цифрлардан байқалғандай, ауданда өнеркәсіп саласы жыл санап қарқынды дамып келеді.
Ауданда өнеркәсiп өндiрiсiнiң барлық негізгі салалары бар деуге болады. Атап айтқанда, металлургия, тау-кен өнеркәсiбi, азық-түлiк өнiмiн өңдеу, құрылыс индус-
триясы салалары тұрақты жұмыс істейді. Индустриалды-инновациялық даму бағдарламасы бойынша ауданда мемлекеттiк бағдарламаларды жүзеге асыру аясында 6 инвестициялық жоба жүзеге асырылған. Сол жобаларды жүзеге асыру барысында 11,2 миллиард теңгенің өнiмі өндірілді. Осы жобалардың қатарында «Төңкерiс АҚП» ЖШС-нің диiрмен кешенi, экспортқа 1,5 миллиард теңгенің 20 мың тоннадан астам ұн мен кебек шығаратын «Даржан Групп» ЖШС, полимер өнiмiн шығаратын «Полимер Пласт» ЖШС, табиғи тас өңдеумен айналысатын «TURAN INDUSTRY» ЖШС сияқты ірі кәсіпорындар бар. Сонымен бірге, 2017 жылы ашылған алтын өндiрумен айналысатын «КазахалтынTechnology» ЖШС-і де аудан өнеркәсібін дамытуға елеулі үлес қосуда. Бұл кәсіпорын өткен жылы 9 миллиард теңгенің өнімін шығарды, атап айтқанда 722 келі алтын мен 597 келі күмiс өндірді.
Ауданда шағын және орта кәсіпкерлік саласы да жақсы дамуда. 2018 жылы тіркеліп жұмыс істеп жатқан шағын кәсіпкерлік субъектілерінің саны 1418-ге жетті. Сауда саласы ғана дамып қоймай, таурлы-сүт фермалары, дәріханалар, моншалар, ауыл шаруашылығы өнімдерін өңдеумен айналысатын кәсіпорындар қатары көбеюде.
Бозайғыр ауылында Лисман жеке кәсіпкерлігі жартылай дайын өнiм шығаратын цех ашып, тәулігіне бір тонна өнім шығару қуаттылығына жетті. Кәсіпкер цехты «Бизнестiң жол картасы — 2020» бағдарламасы бойынша несие алып, соған ашқан. Қазір цехта 20 адам жұмыс істейді. Шортанды кентінде «Риб» жеке кәсіпкерлігі 3 миллион теңге жеңілдетілген несие алып, дәріхана ашты. Ауданның өндіріс көлемін арттыруға үлес қосып, жаңа жұмыс орындарын ашып жатқан осындай шағын кәсіпкерлік субъектілері көп.
– Аграрлық сектор өңiрдiң әлеуметтiк-экономикалық дамуының тұрақтылығын және қамтылуын қамтамасыз ететiн аудан экономикасынының негiзгi саласы болып табылады. Елбасы агроөнеркәсiп кешенi алдында еңбек өнiмдiлiгiн және өңделген ауыл шаруашылығы өнiмiнiң эскпортын 5 жыл iшiнде кемiнде 2,5 есе көбейту мiндетiн қойған еді. Осы міндетті орындау жолында мақсатты жұмыстар жүргізіп келеміз, – деді аудан әкімі.
Бiр жылда ауданның шаруашылықтары 15,9 миллиард теңгенің ауыл шаруашылығы өнімін өндірген. Сөйтіп, бұл саланың өнім көлемі 2017 жылмен салыстырғанда 2 миллиард теңгеге артқан. 2018 жылы 217 мың гектар алқапқа дәнді және бұршақ дақылдары себіліп, гектарынан 15,8 центнерден өнім жиналған. Сонымен бірге, 4,4 мың гектар жерге майлы дақылдар егілген. Егіншілікпен бірге ауданда мал шаруашылығы саласы да жақсы дамып келеді. Қазіргі күні аудан шаруашылықтарында 14,5 мың бас қой, 12,5 мың шошқа, 14,3 мың ірі қара және 49,5 мың құс бар.
Құрылыс жұмыстары қарқыны да көңілден шығады, – деген аудан әкімі өткен жылы 5,7 мың шаршы метр тұрғын үй салынғанын атап өтті. 2018 жылы Шортанды кентінде 36 пәтерлі жалпы көлемі 2188 шаршы метрді құрайтын тұрғын үй пайдалануға берілді. Жеке адамдардың үй салуы үшін жер телімдерін беру мәселесіне жете көңіл бөлінеді. Қазіргі күні Астана агломерациясына кіретін 5 ауылдық округтің бас жоспары бекітіліп, инженерлік коммуникациялар салу жұмыстары жүргізілуде. Құрылысқа салынған инвестиция көлемі 554,6 миллион теңгені құрады.
Кездесу соңында аудан әкімі тұрғындар тарапынан қойылған сан түрлі сауалдарға жа-
уап беріп, жұртшылық көтерген мәселелердің бір де бірі назардан тыс қалмайтынын атап өтті.

Қалкөз ЖҮСІП.
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *