Алда тұрған басты міндет сараланды

Кеше облыс әкімі Мәлік Мырзалиннің төрағалығымен өткізілген кезекті аппарат мәжілісінде жергілікті кәсіпорындар мен ұйымдар бойынша

еңбекақы қарызын өтеу, денсаулық сақтау жүйесін цифрландыру, көп балалы аналарды қолдау шараларының жүзеге асырылуы талқыланып, күн тәртібінде қаралған мәселелер бойынша нақтылы міндеттер белгіленді.

Жиынға облыс әкімінің орынбасарлары, облыстық департаменттер мен басқармалардың басшылары, бұқаралық ақпарат құралдарының өкілдері қатысты. Ең әуелі өңір басшысы Қазақстан халқы Ақмола ассамблеясы секретариатының хатшысы болып тағайындалған Марзият Тохаеваны таныстырды.
Бұдан кейін облыстық еңбек инспекциясы басқармасының басшысы Берік Мұстафин өңірдегі кәсіпорындар мен ұйымдарда жұмысшылардың еңбек қарызын өтеу және төтенше жағдайларды болдырмау бағытында қолға алынған шаралар туралы айтып берді. Өткен жылы облыстағы 523 кәсіпорын мен ұйымдарда тексерістер жүргізілді. Тексеру барысында 2310 еңбеккер алдындағы 189,1 миллион теңге еңбекақы қарызы анықталды. Оның ішінде ең көп Сандықтау ауданында 37,8 миллион теңге, Көкшетау қаласында 33,6 миллион теңге еңбекақы қарызы тіркелді.
– Нәтижесінде 372 жұмыс берушіге ескерту жасалып, оның 256 немесе 98,8 пайызы бойынша олқылықтар жойылды, – деді басқарма басшысы.
Облыстық денсаулық сақтау басқармасының басшысы Сәуле Қисықованың айтуынша, биылғы жылдың соңына өңірдегі денсаулық сақтау жүйесі толықтай цифрландырылатын болады. Сонымен қатар, жыл соңына дейін барлық медициналық мекемелерде 100 пайыз электронды құжат алмасу, 50 пайыз мобильді қосымшамен қамтамасыз ету жоспарланған. Бұл өз кезінде дәрігер мен науқастың өз уақыттарын 50 пайызға дейін үнемдеуге мүмкіндік бермекші. Бұдан бөлек, прфилактикалық байқау мен скриниг арқылы ауруды асқындырмай ерте анықтау көрсеткішін 30 пайызға арттырмақшы.
Сонымен қатар, облыстық жұмыспен қамтуды және әлеуметтік бағдарламаларды үйлестіру басқармасының басшысы Дина Ахметжанованың айтуынша, облыста жасы 18-ге толмаған төрт және одан да көп 5306 көп балалы отбасы бар. Олардың әрқайсысына республикалық бюджет есебінен 10504 теңге көлемінде жәрдемақы төленеді. Бұдан бөлек кедейшілік шебінде өмір сүріп жатқан әлеуметтік жағынан аз қамтылған отбасылардың әрқайсына 14849 теңге көлемінде мекенжай бойынша әлеуметтік көмек көрсетілуде.
– Облыста азаматтардың өмір сүру сапасын арттыру, оның ішінде көп балалы отбасыларға қолдау шарасын нығайту бойынша жұмыс тобы құрылды. Бүгінгі күнге дейін 415 көп балалы отбасына зерттеу жұмыстары жүргізілді. 55 отбасы тұрмыстық жағдайын жақсартуды қажет етеді, 52 отбасы баспана жалдап тұрса, 10 отбасы ағайын-туысқандарының үйлерінде тұрады, – деді Дина Ахметжанова.
Сонымен қатар, басқарма басшысы 2018 жылы 1 мыңнан астам көп балалы отбасының жалпы соммасы 157 миллион теңге көлемінде, яғни, отбасының әр мүшесіне орташа 5300 теңгеден көмек көрсетілгенін атап өтті.
Аппарат мәжілісін қорытындылған облыс әкімі М.К.Мырзалин қажетсіз шығындарды шектеп, оған бөлінетін қаржыны көп балалы аналарды қолдауға бағыттауды тапсырды. Сондай-ақ, тиісті ведомство басшыларына көп балалы отбасыларды бақылауға алып, жергілікті кәсіпорындар мен ұйымдарда жұмысшылардың еңбек қарызын өтеу және наразылық жағдайларды болдырмау үшін алдын алу шараларын жүргізуді міндеттеді. Бұдан бөлек, төтенше жағдайлар департаменті мен жергілікті әкімдіктер бірлесіп, үй-үйді аралап төтенше жағдайлардың алдын алу бо-
йынша тұрғындарға түсіндіру жұмыстарын жүргізуді тапсырды.

Аслан ОСПАНОВ,
«Арқа ажарының» өз тілшісі.
Суретті түсірген Берік ЕСКЕНОВ.

Пікір қалдыру

Міндетті өрістер таңбаланған Обязательные поля помечены *