Игі істер жалғасын табады

Астрахан ауданының әкімі Нұрлан Сейілов тұрғындар алдында берген есебінде өңірдің әлеуметтік-экономикалық дамуының бірқатар жетістіктерін атап көрсетіп, биылғы жылғы жоспарланған жұмыстарға да тоқталды. Есеп беру кездесуіне Қазақстан Республикасы Президенті Әкімшілігінің мемлекеттік инспекторы Қалдыбек Бәйімбетов пен облыс әкімінің орынбасары Айна Мысырәлімова қатысты.

Аудан әкімі Мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты ел халқына арнаған Жолдауы алдарына бірқатар міндеттер қойып отырғанын, ең бастысы халықтың әлеуметтік жағдайын көтеру екенін атап өтті.
–Аудан негізінен астық өндірісімен, мал шаруашылығымен және ауыл шаруашылығы өнімдерін өңдеумен айналысады. Өткен жылы 337 мың гектар алқапқа дәнді және бұршақ дақылдары себілді. Гектар берекесі 13,2 центнерден айналып, 443 мың тонна астық жиналды. Жалпы 25 миллиард теңгенің ауыл шаруашылығы өнімі өндірілді. Жалпы көлем индексі 102 пайызды құрады. Сондай-ақ, егіншілік шаруашылығы 18 миллиард теңгенің өнімін шығарды. Майлы және азықтық дақылдар, картоп пен көкөніс те жинап алынды. Мал шаруашылығы саласында барлық мал түрлерінің саны артқаны байқалады. 6 миллиард 977 миллион теңгенің мал өнімдері өндірілді. Ауданда мал басын көбейтуге және ірі қараның тұқымын жақсартуға ерекше назар аударылады. Осы орайда, 149 бас асыл тұқымды бұқа сатып алынды. Сондай-ақ, мал шаруашылығын дамытудың «Береке», «Игілік», «Ырыс» мемлекеттік бағдарламалары жүзеге асырылуда. Отбасылық мал бордақылау алаңдары қомақты несие алып, 70 бас ірі қара сатып алды. «Нұр-А» және «Петровка-1» ауыл шаруашылығы өндірістік кооперативтері 250 тонна сүт өңдеді. Жаңатұрмыс селосында «Қызылжар Ақмола» ет бағытындағы ауыл шаруашылығы кооперативін құру бойынша жұмыс жүргізілуде. Астананың азық-түлік белдеуін қамтамасыз ету бағдарламасы аясында жергілікті аграршылар Өңірлік
Индустрияландыру картасы аясында жүзеге асырылған «Острогорский», «АПП Астрахан құсы» серіктестіктері 852 миллион теңгенің мал және құс етін сатқан екен. Аудан аумағында отандық астық кептіретін кешен мен механикалық қырман жасап шығаратын «AZAM KC» серіктестігі жұмыс істейді.
–Шағын және орта бизнес саласында 4 мың адам еңбек етеді. Ақпараттық қамтамасыз ету аясында кәсіпкерлікті қолдау орталығы 725 жеке кеңес берді, бизнесті сервистік қолдау бойынша 118 қызмет көрсетті. Есептік кезеңде аудан аумағында бизнестің 10 жаңа нысаны ашылды. Бөлшек тауар айналымының көлемі 2,7 миллиард теңгеден асты. Бюджеттің кіріс бөлігі 109 пайызға орындалды. Мемлекеттік бюджетке 1 миллиард 779 миллион теңге аударылды. Өткен жылы 3 миллиард 733 миллион теңге игерілді. Бюджеттің шығыс бөлігі 100 пайызға орындалды. Облыс әкімі Мәлік Мырзалиннің қолдауының арқасында биылғы жылы өзге бюджеттерден 1,5 миллиард теңге бөлінеді. Бұл қаржыға Ескіқалқұтан, Жаңатұрмыс және Жалтыр ауылдарындағы сумен қамтамасыз ету жүйесі қалпына келтіріледі. Ескіқалқұтан ауылындағы клубқа және Есіл орта мектебіне күрделі жөндеу жұмысы жүргізіледі. Елбасының Жолдауында тұрғын үйдің сапасы мен қолжетімділігіне ерекше назар аударылған. «Нұрлы жер» бағдарламасы аясында 36 пәтерлі тұрғын үй пайдалануға берілді. Жалтыр селосында №3 бу қазандығы жөнделді. Астраханка селосында денешынықтыру және сауықтыру кешенінің құрылысы жүргізілуде. Тұрғын үй құрылысына 275 миллион теңге инвестиция тартылды. 3201 шаршы метр тұрғын үй пайдалануға берілді,–деген аудан әкімі тұрғын үй-коммуналдық шаруашылығы мен елді мекендердің абаттандырылуы жөнінде айтты. «Комхоз» мемлекеттік коммуналдық кәсіпорнының жарғылық капиталын толтыруға облыстық бюджеттен 17 миллион теңге бөлініп, қазандықтар мен қондырғылар сатып алыныпты. Білім мен мәдениет нысандары көмірмен толық қамтамасыз етілген. Ескіқалқұтан, Астраханка мен Жалтыр селоларының ішкі жолдары, Камышенка-Каменка жолы жөнделіпті. Бұл жұмыс биыл да жалғасады. «Өңірлерді дамыту» бағдарламасы бойынша селолық округтерде 19 жоба жүзеге асырылды. Елді мекендерде балалардың ойын және спорт алаңдары салына бастады,–деген аудан басшысы әлеуметтік салалардың жағдайы мен жетістіктері жөнінде айтты. Бұдан кейін облыс әкімінің орынбасары Айна Мысырәлімова сөз сөйлеп, ауданның әлеуметтік-экономикалық дамуына оң бағасын берді, бұл бағытта облыстың дамуы жөнінде жан-жақты әңгімелеп берді.

Рамазан ТІЛЕУОВ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *