Ауғанстан: 30 жыл өтсе де…

Кеше Көкшетау қаласында Кеңес әскерінің шектеулі бөлімшелерін Ауғанстаннан шығарылғанына 30 жыл толуына орай салтанатты

шаралар болып өтті. Облыс орталығындағы интернационалист-жауынгерлер саябағындағы ескерткішке гүл шоқтарын қою рәсімі одан әрі Үкілі Ыбырай атындағы облыстық филармониясында жалғасып, салтанатты жиналысқа ұласып, облыс әкімінің орынбасары Айна Мысырәлімова құттықтау сөз сөйлеп, Ауған соғысының ардагерлері мен қаза болған жауынгерлердің туған-туыстарына облыс әкімінің марапаттарын тапсырды.

Салтанатты жиында облыстық қорғаныс істері департаменті бастығының орынбасары Заңғар Ғаббасов, «Ауған соғысының ардагерлері мен мүгедектері одағы» қоғамдық бірлестігінің төрағасы Дуанбай Ыбырай, сөз сөйледі.
– Ауған соғысы барлығымыздың жүрегімізге жазылмас жара салды. Бұл қайғылы, ұмытылмас оқиға қазақ халқының есінде мәңгі қалары анық. Осыдан 30 жыл бұрын 15 ақпан күні Кеңес әскерлерінің соңғы шебі Ауған жерінен шығарылды. Отан үшін от кешкен ардагерлеріміздің ерлігі еш ұмытылмайды, – деді Айна Мысырәлімова. – Бүгінгі күні бұл соғыс туралы, сол кезде жасалған шешім туралы көптеген пікірлер айтуға болады. Дегенмен, бұл тарихшылардың еншісінде. Сол кездегі өздерінің борыштарын өтеген біздің жауынгерлердің ерлігі ешқашан ұмытылмайды. Олар ата-бабамыздың жауынгерлік дәстүрін жалғастырып, өздерінің борыштарын адал атқарып, қанды шайқастарға қатысты. Интернационалист-жауынгерлер берген тапсырмаларды әскери анттарына сай орындады. Көптеген адам төзгісіз қиындықтарды бастан кешірді. Көпшілігі мемлекеттің жоғары наградаларына ие болды. Бүгінгі бейбіт өмірде біздер Ауған соғысы ардагерлеріне, ұлдары қаза тапқан ата-аналарға, олардың отбасына аса құрметпен қарап, қамқорлық көрсетіп келеміз. Бұл – біздің азаматтық парызымыз. Сондықтан, ардагерлердің тұрмыс-тіршілігін алдағы уақытта да үнемі назарымызда ұстаймыз. Ал олар өз кезегінде жас ұрпаққа әскери-патриоттық тәрбие беруге үлес қосады деп сенемін.
Ақмола облыстық қорғаныс істері департаменті бастығының орынбасары Заңғар Ғаббасовтың айтуынша, Ақмола өңірінен ауған жеріне 1113 ақмолалық аттанып, оның 60-қа жуығы үйіне оралған жоқ. Бүгінгі күні өңірде 800-ге жуық ардагер-интернационалист бар.
– Он жылға созылған соғыс талай отбасының шаңырағын шайқалтты. Қаншама жастың жүйкесі сыр беріп, өмірден баз кешті. Жат жерде жүру, адам төзгісіз қиындықтармен бетпе-бет келудің азабы өз алдына бір тарих, – дейді Ақмола облысы бойынша «Ауған соғысы ардагерлері мен мүгедектері одағы» қоғамдық бірлестігінің төрағасы Дуанбай Ыбырай.
Бұдан соң жиынға қатысушылар кеше ғана өмірден озған Ауған соғысының ардагері, Қазақстан Қарулы Күштерінің отставкадағы полковнигі «қара майор» Борис Керімбаевтың рухын еске алу үшін бір минуттық үнсіздік жарияланды.
Салтанатты шара жергілікті көркемөнерпаздардың орындауындағы концерттік бағдарламаға ұласты.

Аслан ОСПАНОВ,
«Арқа ажарының» өз тілшісі.
Суреттерді түсірген
Төлеген ҚОСШЫҒҰЛОВ.

Пікір қалдыру

Міндетті өрістер таңбаланған Обязательные поля помечены *