Көкшетауда тағы бір жаңа мешіт салынатын болды

Облыс орталығындағы тарихы тереңде жатқан Жақия қажы мешітінің іргетасы қаланғанына бір ғасырдан асты.

Ағаштан тұрғызылған мешіттің сыны кетсе де, сыры кетпейтіні анық. Бірақ, уақыт өткен сайын әбден ескіріп, бірде іргесі сөгіліп, енді бірде мұнарасы сыр беріп жатқаны жасырын емес.

Жуырда осы ғимарат жанына жаңа мешіт тұрғызылатыны жөнінде жылы хабар тарады. Осыған орай, облыс имамы Қуаныш Сәбит мешіттің имамдары мен ақылдастар алқасын жинап, жаңа мешіт туралы пікірлесті.
Басқосуға арнайы қатысқан тарихи ескерткіштерді қорғау мекемесінің өкілдері Жақия қажы мешіті «Рухани жаңғыру» бағдарламасы аясында жергілікті тарихи мұраларды қорғау тізіміне кіргенін айтты. Енді арнайы сараптама жүргізілгесін ғана бұл ғимараттың одан әрі пайдалану жағдайы анықталмақшы. Бірақ, жиынға қатысушылар мешіттің тарихи маңызын ескеріп, оны болашақта музей ретінде пайдалануға болады деген ұйғарымға келді. Ал, мешіт аумағындағы жердің кеңдігі ескеріліп, жаңа құлшылық орнын салуға шешім қабылданды.
Көкшетау қаласындағы «Алуа строй» кәсіпорны осы заманғы Аллаға құлшылық орны, асханасы және басқа да қызметтік кеңселері бар мешіт салуға келісім берген екен. Бұл бастаманы ел ақсақалдары мен зиялы қауым өкілдері қолдап отыр.
Алдағы уақытта жаңа мешіттің жобасы жасалып, оны да талқылап алуға келісті. Ең бастысы, жаңа мешіт ескі құлшылық орнымен бір сәулет кешенін құраса деген ойлар да ортаға салынды.
«Арқа ажарының» өз ақпараты.

Пікір қалдыру

Міндетті өрістер таңбаланған Обязательные поля помечены *