«Бала арманының» мұқтаж жандарға шапағаты

Ерейментау ауданында «Бала арманы» атты қайырымдылық бал кеші ұйымдастырылды.

Науқас балаларға көмек көрсету мақсатында «Ақмола облысының іскер әйелдері қауымдастығы» қоғамдық бірлестігі мен аудандық әкімдік қызметкерлері бірлесіп ұйымдастырған бұл игі іске жергілікті кәсіпкерлер мен қолөнер шеберлері қатысты. Бал кеші шеңберінде қолөнер туындыларының саудасы және аудандық мәдениет үйінің әртістері мен балалар музыка мектебінің тәрбиеленушілерінің концерттік бағдарламасы ұсынылды.
Қайырымдылық шарасының қорытындысы бойынша жалпы сомасы 900 мың теңгеге жуық қаржы жиналды. Ұйымдастырушылар бұл қаржының бір бөлігіне жуырда Түркияда ұлы Ислам Хасеновке ота жасатуды жоспарлап отырған анасына Стамбұлға барып, қайтуы үшін сол жерде, онлайн режимде ұшаққа билет сатып әперді. Сондай-ақ, өзге де шығындары үшін қажетті қаржы бөлді. Бұдан бөлек, жиналған қаржының бір бөлігі Анджела Землянойдың отбасына пәтер жалдау, көмір және азық-түлік сатып әперуге жұмсалса, қалған қаржы кішкентай Алинур Хабибуллинді сауықтыруға бағытталатын болып шешілді.

Аслан ОСПАНОВ.

Ерейментау ауданы.

Пікір қалдыру

Міндетті өрістер таңбаланған Обязательные поля помечены *