Жоғарғы Соттың «Үлгілі сот» бастамашылық жобасын іске асыру аясында Бурабай аудандық сотында сотқа келуші азаматтарға арналған фронт-офис ашылды.
Фронт-офистің ашылуына Ақмола облыстық сотының төрағасы Досжан Әміров, Бурабай ауданы әкімінің орынбасары Уәлихан Ғабдуллин, Ақмола облысы бойынша соттар әкімшісінің басшысы Дәнияр Сапарбек, Бурабай аудандық сотының төрағасы Абзал Балабеков, аудандық соттың судьялары, медиаторлар, адвокаттар, құқық қорғау құрылымдарының, мемлекеттік және ведомстволық органдардың өкілдері, қала тұрғындары қатысты.
Облыстық соттың төрағасы Досжан Әміров «Үлгілі сот» жобасы аясында құрылған фронт-офис азаматтарға ұсынылатын сот қызметтері мен сервистерінің сапасын арттырып, сонымен қатар, сот жұмысын оңтайлы ұйымдастыруға мүмкіндік беретінін және сотқа жүгінген азаматтарға қолайлы жағдай туғызатынын атап өтті. Азаматтарға арналған офистің ашылуымен Бурабай ауданы әкімінің орынбасары Уәлихан Ғабдуллин құттықтап, Бурабай аудандық ардагерлер кеңесінің төрағасы Малгелді Жұмағұлов ақ батасын берді.
Фронт-офис кең залда орналасқан және қазіргі заманғы стандарттарға сай жиһазбен жабдықталған. Қызмет көрсету бөлімдері әйнек қабырғамен бөлінген. Барлығы ашық және қолжетімді. Сот маманы сотқа келушілерді қарсы алып, кеңес береді. Ақпараттық стендтерден қажетті ақпараттар алуға болады. Күту залында интернет желісі орнатылған.
«Фронт-офистің басты мақсаты – сотқа келушілерге ыңғайлы болу үшін қолайлы жағдай жасау», – дейді соттар әкімшісінің басшысы Данияр Сапарбек.
Ақмола облыстық сотының
баспасөз қызметі.
