Бос жұмыс орындарының жәрмеңкесі

Ақмола облыстық жастар ресурстық орталығы жұмыссыз жүрген жастар үшін «Бос жұмыс орындарының жәрмеңкесін» өткізді. Биылғы жылы екінші рет ұйымдастырылып отырған жәрмеңкенің нәтижесінде екі қолға бір күрек тапқандар да жоқ емес.

Елімізде жұмыссыздықпен күрес жүргізілгенімен, бұл мәселе әлі күнге дейін күн тәртібінен түспей тұр. Қазіргі уақытта жұмыссыздық дерті тек қазақ қоғамын ғана емес, әлем елдерін де алаңдатып отыр. Бұл – бүгінгі қоғамда айқын көрініс тапқан мәселелердің бірі.
Жастар арасындағы жұмыссыздықтың артуына себеп те аз емес. Солардың қатарында ең әуелі жоғары оқу орындарының нарық талабына сай маман даярлай алмауы, мамандарды әзірлеу үшін онда қажетті инфрақұрылымдардың болмауы, жұмыс берушілердің жас мамандарды жылы қабылдамайтындығы да бар. Мұны ешкім жасырып қала алмайды.
Аталған жәрмеңкенің мақсаты – облысымыздағы тұрғындарды тұрақты және уақытша жұмысқа орналастыруға жәрдемдесу, халықтың әлеуметтік белсенділігін арттыру, жұмысқа орналасу мәселелері бойынша кеңес беру.
Жәрмеңкеде әртүрлі саладағы 25-тен астам жұмыс берушілер, өздерінің 100-ге жуық бос жұмыс орындарын ұсынды. Шарапаты мол іске Көкшетау қалалық жұмыспен қамту орталығы, Қазақстан Республикасының Мемлекеттік қызмет істері агенттігінің Ақмола облысы бойынша департаменті және Ақмола облысы төтенше жағдайлар департаменті өрт сөндіру және апаттық-құтқару жұмыстары қызметінің өкілдері мен өзге де мекемелер қатысты.
Жас мамандарды қолдау мақсатында ұйымдастырылған іс-шарада 20-дан астам адам сұхбаттасудан сәтті өтіп, жұмысқа орналасуға мүмкіндік алды. Жәрмеңке алаңында әрбір қатысушы кәсіби мамандарға көкейлерінде жүрген сауалдарын қойып, өзінің таңдаған мамандығы бойынша толық мәліметке қанықты.
«Арқа ажарының» өз ақпараты.

Пікір қалдыру

Міндетті өрістер таңбаланған Обязательные поля помечены *