Қазақстан Республикасының Премьер-Министрі Асқар Мамин бүгінгі Үкімет отырысында 1 апта ішінде коронавирус инфекциясының таралуына қарсы күрес бойынша жаңа шараларды дайындауды тапсырды. Бұл туралы Үкіметтің баспасөз қызметі хабарлады.
Үкімет басшысының айтуынша, коронавирус инфекциясына қатысты жағдай күрделі күйінде қалып отыр. Соңғы екі аптада барлық дерлік өңірде науқастар саны көбейді. «Осыған орай, Мемлекет басшысының тапсырмасы бойынша, Ведомствоаралық комиссияның кешегі шешімімен алдағы демалыс күндері бірқатар ірі қалаларда және тұрғындарының саны 50 мыңнан асатын барлық өңірлердің елді мекендерінде қосымша шектеу шаралары енгізілді.
Бұл шешім нақты орындалуы қажет. Әкімдіктер санитарлық нормалар мен қоғамдық жерлерде әлеуметтік арақашықтықтың қатаң сақталуына ерекше назар аударуы тиіс. Денсаулық сақтау министрлігіне әкімдіктермен бірлесіп, коронавирус инфекциясының таралуына қарсы күрес бойынша жаңа шаралар кешенін бір апта ішінде дайындауды тапсырамын. Әрбір өңірдегі жағдайды ескере отырып, іске асырылатын шараларды өзгерту бойынша жедел шаралар қабылдансын», – деді Асқар Мамин.
