Өткен жұма күні Қазақстан Республикасының Ішкі істер министрлігі Төтенше жағдайлар комитетінің төрағасы Валерий Петров және облыс әкімі аппаратының басшысы Мұратбек Тақамбаев облыс орталығындағы Тәуелсіздік алаңында биыл Көкшетау техникалық институтына оқуға түскен курсанттардың ант қабылдау рәсіміне қатысып, құттықтау сөз сөйледі.
Бүгінгі таңда Көкшетау техникалық институты Қазақстандағы өрт қауіпсіздігі саласында білікті мамандар – кадрлық офицерлер даярлайтын бірден-бір арнайы оқу орны десек қателеспейміз. Бұл мекеме қазіргі уақытқа дейін 3,7 мыңнан астам жоғары кәсіби мамандығы бар офицерлерді даярлап шығарды. Олардың бәрі еліміздің түкпір- түкпірінде өрт сөндіру қызметін абыроймен атқаруда. Ал, биылғы оқу жылы аталған білім ордасының қабылдау комиссиясы 177 талапкерді оқуға қабылдаса, оның 57-сі Ресей және Беларусь елдеріндегі Төтенше жағдай министрлігінің жоғары білім ордаларына оқуға жіберілді. Ал, қалған 120-сы Көкшетау техникалық институтында білім алатын болып отыр.
Тәуелсіз еліміздің болашақ өрт сөндірушілерінен ант қабылдауға арнайы келген Қазақстан Республикасының Ішкі істер министрлігі Төтенше жағдайлар комитетінің төрағасы Валерий Петров курсанттарды құттықтап, келешекте еліне адал қызмет атқаратындықтарына сенім білдірді.
–Ант қабылдау – бұл өте маңызды құқықтық және моральдық-саяси оқиға. Бұл өртке қарсы қызметтің мемлекеттік маңызға ие екендігін білдіреді. Құжатта мемлекеттің біздерге қояр талабы айқын көрсетілген. Бұл бізге елімізде өрт қауіпсіздігін сақтауға ең жоғары дәрежеде қасиетті де құрметті жауапкершілік пен міндеттер жүктейді, – дейді курсант Толқын Тұрсынов.
Салтанатты шараның соңы сап түзеген жас өрт сөндірушілердің әскери шеруіне ұласты.
«Арқа ажарының» өз ақпараты.
