Облыстық төтенше жағдайлар департаменті бұқаралық ақпарат құралдарының өкілдерімен баспасөз мәслихатын өткізді. Онда суға шомылу маусымы кезеңінде су айдындарында азаматтардың қауіпсіздігін қамтамасыз ету мәселесі талқыланды.
Облыстық төтенше жағдайлар департаменті бастығының орынбасары, азаматтық қорғаныс полковнигі Манарбек Шапағатовтың айтуы бойынша өткен жылы қауiпсiздiк шараларын сақтамау салдарынан 29 адамның өлімі тіркелген, олардың 8-i балалар. Ал, биылғы жылы бұл көрсеткіш 14 адамды құрайды, оның ішінде 2 жасөспірімнің өлімі бар дей келіп, облыс бойынша адамдардың суға батуы Целиноград ауданында басымырақ екендігіне тоқталды. Содан соң облыстық жедел құтқару жасағының басшысы Дәулет Шамиғанов төтенше жағдайлар департаментінің қызметкерлері халықты ақпараттандыру жұмыстарын жүйелі жүргізетіндерін, 2016 жылдың басынан бері судағы қауіпсіздік ережелерін сақтау шаралары бойынша теледидар мен радио тораптарынан 167 хабарлама берілгенін, аудандық және облыстық бұқаралық ақпарат құралдарында 50 мақала жарияланғаны, 93 хабарлама электронды басылымдарда жарыққа шыққаны жайлы айта келіп, облыс мектептерінде 16 интерактивті сабақтар өткізіліп, 72 дәріс оқылғандығын тілге тиек етті. Ал, төтенше жағдайларды жою бөлімінің бастығы, азаматтық қорғаныс подполковнигі Азамат Қажкенов жиналғандарға суға шомылу маусымы кезеңінде су айдындарында азаматтардың қауіпсіздігі және алдын алу шаралары туралы, суға түскенде аса сақ болулары керектігін айтты.
Отырыс соңында мамандар тілшілер тарапынан қойылған сауалдарға тұшымды жауап берді.
Назгүл РАБИЛОВА.
