Елдің тілегі ескерілді

Облыс әкімінің орынбасары Дәурен Әділбеков «Нұр Отан» партиясы Ақмола облыстық филиалының қоғамдық қабылдау бөлмесінде азаматтарды қабылдады.Қордаланған мәселелерін шешу үшін облыс орталығы мен ауданда тұратын үш тұрғын қабылдауға жазылды.

Үстіміздегі жылы кешкі мектепті тәмамдаған үшінші топтағы мүгедек Владимир Гладков   жұмысшы мамандығын алуға  көмек көрсетуді сұрады.  Дәурен Әділбеков жұмысшы мамандығын игеруге деген құлшынысы жоғары жас жігітке ризашылығын білдіріп, діттеген мақсатына жетуін тіледі. Бүгінде қоғамдық қабылдауда болған азамат  қаладағы  №1 сервистік-техникалық колледжіне  «Автокөлік құралдарын жөндеу және техникалық қызмет көрсету» мамандығына оқуға түсті.
Целиноград ауданына қарасты Оразақ ауылының тұрғыны Әмина Нұрпейісова  өзінің екінші топтағы мүгедек жиенін мүмкіндігі шектеулі жандарға арналған  интернатқа орналастыруын өтінді. Облыстық жұмыспен қамту және әлеуметтік бағдарламаларды үйлестіру басқармасының мәліметіне сүйенсек, азаматшаның жиені №118-ші интернатқа жіберілуге кезекте тұр екен. Әзірге отбасының әлеуметтік жағдайының ауырлығына байланысты  жарымжан Степногорск қаласындағы стационарға жөнелтілмек. Ал, қала тұрғыны Ләззат Жаманбаева   тұрғын үйге кезекке тұру мәселесі бойынша өтініш жасады. Оған тұрғын үй заңнамасы түсіндіріліп, сауалдарына нақты жауап берілді.
«Арқа ажарының» өз ақпараты.

Пікір қалдыру

Міндетті өрістер таңбаланған Обязательные поля помечены *