Тұрғындарды пәтер мәселесі мен оталған ағаштың жайы толғандырады

Облыс әкімінің орынбасары Владимир Балахонцев «Нұр Отан» партиясының облыстық филиалында тұрғын үй-коммуналдық шаруашылығы мәселелері бойынша келген тұрғындарды қабылдады.

Бұл жолы қоғамдық қабылдауға бірінші болып кірген Көкшетау қаласының тұрғыны Баян Әлжапарова өзі тұратын үйді тұрғын үй-коммуналдық шаруашылығын жаңғырту бағдарламасына енгізуді ұсынды. Оның айтуынша, ағымдағы жылдың басында барлық құжаттар қалалық әкімдікке тапсырылған. Алайда, ол жақтан нақты жауап жоқ көрінеді.
Ал, Жолбарыс Әбішевтің айтуынша, Застанционный кентіндегі үйінің маңындағы ағаштарды «Көкше жылу» коммуналдық кәсіпорнының қызметкерлері жылу құбырына кедергі келтіреді деп отап тастаған көрінеді. Зейнеткер осы мәселесімен қалалық прокуратураға да барған екен. Заң органдары арызданушының өзіне рұқсатсыз ағаш отырғыздың деп, коммуналдық кәсіпорынның әрекетін заңды деп тапқан. Облыс әкімінің орынбасары ереже бойынша коммуникация жүйесінің маңына 2 метрден жақын ағаш отырғызуға болмайтынын түсіндіре келе, зейнеткер тұратын көшенің бойына жаңа жылу құбыры тартылып, кейін ағаш көшеттері рет-ретімен отырғызылатынын түсіндіріп айтты. Сонымен қатар, қала әкімінің орынбасары Шамрат Сәдуақасовқа аталған жерге барып, қарияға мән-жайды нақтылап тағы бір ұғындыруды  тапсырды.
– Менің ашынатын себебім, ешкім ештемені нақтылап түсіндірмеді. Осыдан он екі жыл бұрын отырғызған 76 түп ағашты коммуналдық сала қызметкерлері бір сәтте отап тастады. Тіпті, прокуратураның өзі мені кінәлі етті, – дейді зейнеткер. Ал, «Көкше жылу» коммуналдық кәсіпорнының өкілі болса, жылу құбырларына кедергі келтірген ағаштарды амалсыздан кесуге тура келді дейді. Сондай-ақ, баспана мәселесімен келген Рүстем Ғаббасовтың пікіріне құлақ түрілді. Оның айтуынша, ол екі бауырымен жетімдер санатында. Бүгінгі күні Рүстемнің жасы 29-дан асқан. – Сондықтан, ол жетім ретінде баспана кезегіне тұра алмайды. Ал, өзінен кейінгі бауырларына пәтер кезегіне тұруына болады. Ол үшін тиісті құжаттарын жинап, халыққа қызмет көрсету орталығына баруы керек, – деп түсіндірді Владимир Балахонцев.
Сонымен қатар, қоғамдық қабылдауда коммуналдық төлемақы, тұрмыстық қалдықтарды сыртқа шығару мәселесі де сөз болды.

Аслан Оспанов.

Суретті түсірген Берік ЕСКЕНОВ.

Пікір қалдыру

Міндетті өрістер таңбаланған Обязательные поля помечены *