Бұрын туған топырағынан сыртқа бір қадам аттап шықпаған қазақтардың да қазір шет елде тұруы, сонда жұмыс істеуі таңсық болмай қалды. Биыл қысқа қарай сондай туысымызға Біріккен Араб Әмірліктеріне қыдырып бардық.
Басқа елдің жеріне аяғың тиген соң, тұрмысына, салт-дәстүріне назар аударып, өз еліңмен салыстыра бастайсың. Біз де сол күйді басымыздан кешпей жүре алмадық. Бәрі керемет. Халқына барлық жағдайды жасап қойған.
Үйде мектеп жасындағы балалар бар болғаннан кейін мен өзім осы елдегі білім саласына көңіл бөле жүрдім. Мұнда шет елден де адамдар көп болғаннан кейін балалар араб, сосын ағылшын мектептерінде оқиды екен. Жұма, сенбі екі күн дем алады. Қасиетті жұма – бұл елде жаппай демалыс күні. Балалар ата-аналарымен мешітке барады, түрлі үйірмелерге қатысады. Әрі ол үйірмелер аптасына бір рет демалыс күндері өздері оқитын мектептерде өткізіледі. Біздегідей әр күні баланы жетектеп, әр жерге бір бару жоқ.
Араб Әмірліктерінде мектеп оқушыларына үйге тапсырма бермейді. Бала шамамен күндізгі сағат 3-4-ке дейін мектепте болып, сабағын сонда қарап келеді. Біздегідей үйге келіп, тағы сабақ оқып, сарылып отыру дегенді білмейді. Баласын оқытатын мұғалімді де ата-аналар көрмейді екен. Ұстаздар ата-ананың ықпалында кетіп қалмауы үшін солай жасап қойған. Әр мұғалімнің көмекшісі бар. Солар ата-аналармен қарым-қатынасқа жауап береді, басқа да баланың тәрбиесі, қауіпсіздігі мәселелерімен айналысады.
Біздегідей бұл елде де тест тапсыру бар көрінеді. Әр апта сайын оқушылар тест тапсырып, балалардың білімі сол арқылы сарапталып отырады. Келесі бір байқағанымыз, біздегі кәдімгі оқулық пен дәптерге сықиып толған, сол себепті салмағы аз емес сөмке мәселесіне де жете көңіл бөлінген. Сөмкелерінің бәрі дөңгелегі бар, сүйретпелі, алып жүруге ыңғайлы, жеп-жеңіл. Олай болатын да жөні бар, мұндағы қалаларда жолдар, үйдің маңайлары теп-тегіс, кедір-бұдыр жерлер атымен жоқ. Осылайша дәулеті мен сәулеті келіскен елдің білім саласындағы жетістіктеріне де қызығып оралған жайымыз бар.
Қанағат СЕРІКБОЛСЫНҚЫЗЫ.
Аршалы ауданы.
