Қазақ жазуының латын әліпбиіне көшірілуі заман талабы екені бәрімізге аян. Бірақ, қазақ халқы үшін латын әліпбиі аса таңсық нәрсе емес деп ойлаймын. Біз сонау өткен ғасырдың жиырмасыншы жылдарында-ақ латын графикасына көшу керек деген шешімге келген болатынбыз.
Бұл сол кезде еліміздің тізгінін ұстаған Алаш арыстарының бастамасы еді. Оның астарында бүкіл түркі халықтарының ішінен ғылымға ерте бет бұрған қазақ халқын өзге туыстас халықтарға үлгі етіп, түркі әлемінің ұйытқысына айналдырудың идеясы жатыр. Тек қырқыншы жылдары ғана қазақ тіліне орыс сөздерін енгізуді оңтайландыру саясатымен қазақ жазуы кириллицаға көшірілді.
Сондықтан, өз басым қазақ жазуын латын графикасына көшіру үлкен қарқынмен іске асуы тиіс деп ойлаймын, себебі, бұл қазақ тілін заман талабына жауап бере алатын ғылым мен жоғары технология тіліне айналдыру үшін маңызы бар бастама.
Қазақ тілін болашақтың тіліне айналдыру үшін оның жазуы ең алдымен ақпараттық технология талаптарына сай келуі тиіс.
Олай болса, қазіргі таңда бекітілген латын әліпбиінің нұсқасы дәл осы талаптарға жауап бере алады деп ойлаймын.
Серғазы ҚАЙЫРБОЛДЫ,
Көкшетау қалалық
қазақ кітапханасының кітапханашысы.
