Астанадағы Қазақстан Республикасының Ұлттық музейінде Жер реформасы жөніндегі республикалық комиссияның кезекті үшінші отырысы өтті.
Қазақстан Республикасы Премьер-Министрінің орынбасары Бақытжан Сағынтаевтың жетекшілігімен өткен комиссияның отырысында негізгі тақырып ауыл шаруашылығы мақсатындағы жерлерді шетелдіктерге жалға беру немесе бермеу мәселесін талқылау болып айқындалған болатын. Айта кетерлігі, бұған дейін комиссия төрт бағыттағы жұмыс топтарын айқындап, олардың жетекшілері сайланған. Өткен бір апта ішінде осы төрт топ негізгі тақырыптарды талқылап, Ауыл шаруашылығы министрлігі жанындағы штабта бірқатар жұмыстар атқарған. Осыған байланысты Б.Сағынтаев жұмыс топтарының атқарған шаралары туралы жетекшілерден қысқаша баяндама тыңдауды ұсынды.
Ауыл шаруашылығы саласында Қытайдан қаша беруге болмайды, қайта оларға баруымыз керек. Бүгін Жер реформасы жөніндегі комиссияның отырысында Қазақстан Республикасы Премьер-Министрінің орынбасары, комиссия төрағасы Бақытжан Сағынтаев осылай мәлім етті.
Жер реформасы жөніндегі комиссияның алғашқы көшпелі отырысы Ақмола облысында өтуі мүмкін. Бұл туралы комиссия отырысында Үкімет басшысының орынбасары, комиссия жетекшісі Бақытжан Сағынтаев мәлім етті.
Б.Сағынтаевтың айтуынша, жер комиссиясының отырысында бірқатар мәселелер ортаға салынды. Сондағы ұсыныстың бірі – халық арасына шығып, комиссия көтерген пікірлерді халыққа жеткізіп, жұрттың пікірін де білу.
«Келесі отырысты біз өңірлерге шығудан бастасақ. Бөлініп, топ-топпен халықты аралайық, пікірлесейік. Бір топты мен басқарайын, екіншісін Мұхтар Абырарұлы басқарсын, үшіншісін Асқар Мырзахметов басқарсын деген секілді», – деді Б.Сағынтаев. Осыған байланысты комиссия жетекшісі арнайы кесте жасауды да ұсынды. Оның айтуынша, комиссия бір айда өңірлерді аралап, Астанада қайта бас қосуды жоспарлайды. Сосын өңірлерді тамыз айының соңына дейін аралап шығып, содан қорытындылар, талдаулар жасауға кіріседі.
«Сондықтан да, келесі кездесуді Астана маңындағы Ақмола облысында баруды ұсынар едім. Осы облыстың төңірегіндегі мәселелерді талқылайық, оған шекаралас жерлерге де барайық. Комиссиямен осыны келісейік, шаруа қожалықтарын, белсенді азаматтардың бәрін сол отырысқа шақырайық. Сол үшін бүгін Ақмола облысына баратын мүшелерді, белсенділердің тізімін жаза берсек деп отырмын. Сосын күнін белгілеп, көшпелі отырыстарды Ақмола облысынан бастасақ», – деді Б.Сағынтаев.
