Павлодар облысының Екібастұз қаласынан арнайы келген Әйгерім Тәженова облыс прокурорына біздің өңірімізде орналасқан ЕЦ-166/4 түзеу мекемесінде жазасын өтеп жатқан жолдасына қатысты мекеме қызметкерлері тарапынан заңсыз әрекеттер жасалуына орай шағымданды. Оның жолдасының шағымы бойынша мекеме қызметкерлеріне қарсы іс ашылып, бірақ, ол жабылып қалған екен. Кейін қайта шағымданып, таяу арада сот болмақшы дейді арызданушы. Ол облыс прокурорынан түзеу мекемесі басшыларының өз әрекеттері үшін заң алдында жауап беруі қамтамасыз етілсе деген өтінішін айтты. Облыс прокуроры бұл істі жеке бақылауына алып, бәрінің заң бойынша жасалуын қамтамасыз етуге уәде берді.
Бурабай ауданынан келген кәсіпкер Иван Попов бес жылдан бері соттасып, әділдік таба алмай келе жатқанын айтып, жүйкесін жұқартып, әуреге салған осы істі заң талабына сай шешілуіне жағдай жасасаңыз деген өтінішін білдірді. Ал, жалданып жұмыс істеп, табыс тауып жүрген күйеу баласының тракторға тапталып, жарақат алуына байланысты қылмыстық істің төрт айдан бері сағызша созылып кеткеніне налыған Жарасбай Беспаев құқық қорғаушылардың өз міндеттерін дұрыс орындамайтынын айтып шағымданды. Облыс прокуроры жеке қабылдауына арызданып келген азаматтарға прокуратура тарапынан істің ақ-қарасы анықталып, бәрінің қатаң заң шеңберінде шешілуін қамтамасыз етілетінін атап өтті және бұл істерді жеке бақылауына алатынын мәлімдеді.
«Арқа ажарының» өз ақпараты.
