Бауыржан Момышұлы: «Ұлыңыздың басынан сипамаңыз!»
Бұрын қазақтар ер баланы еркелеткенде басынан сипамаған. Арқасынан қаққан. «Басынан сипау ұл баланы аяп, мүсіркеу сезімдерін туғызады, төмен қарап жүретін жасық болып қалады» деп түсінген. Ата-ана, ел-жұртына қорған болатын, шаңыраққа ие болатын ұлдың көзін жерден алмайтын жігерсіз, есіркеуді тілеп тұратын ынжық болғанын қаламаған, Ал, арқасынан қаққанда ер бала батылданады, жігерленеді, еңсесін тік ұстап, тура қарауға дағдыланады. Неге болса да тайсалмай қарайтын қайратты, батыл болып ержетсін деп ұлды арқадан қағыпты.
Ал, қыздарды керісінше басынан сипаған, қыз – жатжұрттық, қыздың бағы – үйде емес, түзде. Қыз басқа босағаны аттап, өзге үйдің отын жағады, ұрпағын өсіреді. Қызды «кететін бала ғой» деп еркелетеді. «Алдында не күтіп тұр екен, тағдыр-талайы қалай болады» деп басынан сипап аялаған. Қыз баланы басынан сипағанда басы еріксіз еңіс тартады, көз жанары төмен түсіп, жасырынады. Кісі бетіне бажырайып қарамайтын әдетке үйреніп қызға лайық биязы мінез қалыптасады.
Арқадан қағу мен бастан сипаудың осындай талғамды астары, тәрбиелік мәні бар екен.
Жеті жағдайда сөз қозғама:
1. Кедейдің қасында дүниең туралы.
2. Науқастың алдында деніңнің саулығы туралы.
3. Әлсіздің алдында күш-қуатың жайлы.
4. Жолы болмай жүрген кісінің алдында бақытты екенің жайлы.
5. Түрмедегі кісінің алдында бостандығың туралы.
6. Бедеу кісінің алдында балаларың туралы.
7. Жетімнің алдында әке-шешең туралы.
