Ақмола облысы бойынша қылмыстық атқару жүйесі департаментінің ЕЦ-166/24 мекемесінде «Қақпа алдындағы кездесу» әлеуметтік жобасын жүзеге асыру аясында іс-шара өтті.
Жобаның мақсаты – түрмеден босатылған азаматтардың жұмысқа орналасып, олардың қоғамға бейімделуіне жол ашу, құжаттандыру, әлеуметтік байланыстарды қалпына келтіруге жәрдемдесу болып табылады. ЕЦ-166/24 мекемесінде өткен бұл кездесуге жергілікті атқарушы органдардың өкілдері, атап айтсақ Ақмола облысы бойынша қылмыстық атқару жүйесі департаменті пробация қызметі бастығының орынбасары, әділет майоры Бибігүл Бұланова, жергілікті полиция қызметі бөлімінің учаскелік инспекторы, полицияның аға лейтенанты Нұрлан Омаров, Көкшетау қалалық әкімдігінің жұмыспен қамту және әлеуметтік бағдарламалар орталығының заңгері Дастан Бекешев, «ЕЦ 166/24» түзету мекемесінің аға әділет лейтенанты Ерлан Бекешев қатысты.
Шара қатысушылары қоғамға қайта бейімделу процесінің тиімділігі көптеген жайттарға байланысты екенін атап өтті. Соның ішінде, әсіресе, сотталғандарды бостандыққа шығуға дайындаудың, темір тордан шыққаннан кейін оларға әлеуметтік-психологиялық көмек көрсетудің маңыздылығы зор екендігі айтылды.
«Қақпа алдындағы кездесу» әлеуметтік жобасы Қазақстан Республикасы Президентінің 2016 жылғы 8 желтоқсандағы Жарлығымен бекітілген 2017-2019 жылдарға арналған Қазақстан Республикасында пробация қызметінде есепке тұрған және түзету орындарынан босап шыққан азаматтарды әлеуметтік оңалтудың кешенді стратегиясы аясында жүзеге асырылады.
Қазіргі таңда жазасын өтеу орындарынан босап шыққандарды әлеуметтік оңалту, қоғамға қайта бейімдеудегі басты мақсат осы топтардың арасында қылмыстың екінші мәрте қайталануын азайту болып табылады. Бұрын сотталғандарды бейімдеу – қылмыстық атқару жүйесі органдарының ғана емес, барша қоғамның міндеті болуы керек. Бұл жауапты істе барлық өкілетті органдардың және үкіметтік емес ұйымдардың бірлескен жұмысы ғана оң нәтиже бере алады.
Жазира БЕГАЙДАРОВА,
«ЕЦ-166/24» түзету мекемесінің аға инспекторы,
аға әділет лейтенанты.
