«Нұр Отан» партиясы жанындағы «Жас Отан» жастар қанаты облыстық филиалының коворкинг орталығында өткен «Еркін пікір» пікір алмасу алаңында жастар Қазақстан Республикасы Президентінің кезектен тыс сайлауын өткізудің маңыздылығын талқылады.
Шара барысында Көкшетау қалалық «Жас Отан» жастар қанатының төрағасы Аян Хафиз, Абай Мырзахметов атындағы Көкшетау университетінің оқытушысы Ризат Елубаев, «Ақмола облысы «Жас Ұлан» бірыңғай балалар мен жасөспірімдер ұйымы» қоғамдық бірлестігінің төрайымы Мәнсия Есекеева Президент сайлауының маңыздылығы жайлы айта келе, жастарды барынша белсенді болуға шақырды. Пікір алмасу алаңында жастарға бүгінгі заманда әр адамның азаматтық ұстанымының болуы, саяси сауаттылығы мен заңды жіті білуі өте маңызды екендігі айтылды.
Аталған университет оқытушысы Ризат Елубаев: –Алда келе жатқан кезектен тыс Президент сайлауында әрбір қазақстандықтың азаматтық ұстанымын танытуы аса маңызды. Бұл еліміздің болашағын айқындайтын маңызды саяси науқан. Сол себепті, ешкім жайбасарлық танытпауы керек. Әсіресе, жастар белсенді болуға тиіс. Бұл сайлауда мені үміткерлердің саны емес, олардың еліміз, халқымыз үшін не істей алатыны толғандырады. Алдымен, жастар өзіміз саясатқа араласып, осындай саяси науқандардан қалыс қалмауымыз керек, – деп жастарға «Қазақстан Республикасындағы сайлау туралы» Заңының ережелерін, сайлауға кімдер қатыса алатынын қысқаша түсіндіріп өтсе, бірлестік төрайымы Мәнсия Есекеева «жастарға сайлау не үшін қажет?» деген сауал төңірегінде өз ойын ортаға салды.
«Арқа ажарының» өз ақпараты.
