Әлеуметтік желіде Қытайдан шыққан қатерлі коронавирус індеті Көкшетауға келіпті деген хабар жарияланған еді. Осыған орай, облыстық денсаулық сақтау басқармасына хабарласқан едік.
«Көпсалалы облыстық балалар ауруханасына жатқызылған науқас балалардан тиісті анализдер алынып, оларда коронавирус емес, А типті тұмау екені анықталды. Мұны Ақмола облысының тауарлар мен көрсетілетін қызметтердің сапасы мен қауіпсіздігін бақылау департаменті жүргізген сараптама нәтижелері көрсетті, – деді басқарманың баспасөз хатшысы Фатима Россолова.
Айта кетейік, Қытайда демалыста болған отбасы Көкшетауға келген күні, яғни, 28 қаңтарда көпсалалы облыстық балалар ауруханасының жұқпалы аурулар бөлімшесіне жатқызылған болатын. Отбасындағы ересектер – әкесі мен анасының және бір баланың денсаулығын дәрігерлер бірден жақсы деген. Ал, бес және үш жасар тағы екі баланың ыстығы көтеріліп тұрғасын олар тиісті бақылауға алынған.
«Арқа ажарының» өз ақпараты.
