«Nur Otan» партиясының Ақмола облыстық филиалында «Ақмола облысының кәсіподақ орталығы» аумақтық кәсіподақтар бірлестігінің бастамасымен ауыл шаруашылығы еңбеккерлерінің еңбек құқықтарын сақтау мәселелері талқыланған дөңгелек үстел өтті.
Қазақстан Республикасының Кәсіподақтар федерациясы мен «Nur Otan» партиясы арасындағы әріптестік жөніндегі меморандум шеңберінде ұйымдастырылған шараға партия филиалы төрағасының бірінші орынбасары Ғалым Бекмағамбетов, «Ақмола облысының кәсіподақ орталығы» аумақтық кәсіподақтар бірлестігінің төрағасы Қали Рахметов, өңірлік кәсіпкерлер палатасы, әлеуметтік медициналық сақтандыру қоры, облыстық прокуратура, «БЖЗҚ» акционерлік қоғамының облыстық филиалы, зейнетақы төлеу бойынша мемлекеттік орталық, еңбек инспекциясы, ауыл шаруашылығы басқармасы және салалық кәсіподақ ұйымдарының өкілдері қатысты.
Дөңгелек үстел барысында тараптар көтеріліп отырған мәселенің өзектілігіне тоқталды. Оның ішінде бірыңғай әлеуметтік төлемдерге қатысты туындап отырған мәселелерді шешудің мүмкіндіктері айтылды.
Сонымен қатар, ауыл шаруашылығы еңбеккерлерінің еңбек және әлеуметтік құқықтарын сақтауға кепіл беретін ұжымдық келісім-шарттар жасау қажеттілігі сөз болды. «Nur Otan» партиясының жұмыс топтары өңірлік филиалдар арқылы кәсіподақтарға ұжымдық келісім-шарттардың санын арттыруға атсалыспақшы.
Осы арқылы ауыл шаруашылығы еңбеккерлері белгіленген әлеуметтік жеңілдіктерге қол жеткізе алатын болады.
Аслан ОСПАНОВ,
«Арқа ажарының» өз тілшісі.
Суретті түсірген Берік ЕСКЕНОВ.
