Тамағыңыз ауырып, мұрын бітіп, өзіңізді әлсіз сезінсеңіз, бірақ дене қызуы жоқ болса да, уақыт өткізуге болмайды.
Бұл туралы алматылық дәрігер инфекционист Тамара Утағанова онлайн брифинг барысында баяндады. Оның мәлімдеуінше, вирус жұқтырғандардың барлығында дене қызуы көтеріле бермейді. Аурудың белгісі әр адамда әртүрлі жағдайда сипат береді екен.
– «Симптомсыз келгендердің көбі өзін жақсы сезінеді, алайда рентген немесе компьютерлік томография кезінде олардан вирус анықталды. Егер адамдар өз денсаулығының нашарлағанын, өзін жайсыз сезінсе, вирусқа күдіктенсе, емханадағы дәрігерлерге немесе call-орталыққа қоңырау шалып, кеңес алғаны жөн. Дене қызуы болмаған соң, сырқатын елемегендердің көбі ауыр халде немесе орта ауыр деңгейде түсіп жатыр», – дейді дәрігер.
Сонымен қатар, ол қала тұрғындарына адам көп жиналатын жерлерге барудан бас тартып, иммундық жүйені көтеруге күш салу қажеттігін баса айтты. Одан бөлек, бей-берекет химиялық дәрілерді қабылдап, иммундық жүйені әлсіретпеген дұрыс. Тек созылмалы аурулары болған жағдайда ғана дәрігердің нұсқауымен дәрі қабылдап, емделгені дұрыс, – дейді дәрігер инфекционист. Әр адам өз иммунитетін көтеру үшін алдымен жеке гигиеналық тазалықты ұстанып, адамдар көп жиналатын жерден аулақ жүргені абзал. Бастысы, дұрыс тамақтанып, ұйқыны қандырған жөн екен. Аяқ-үсті емделмей, бауырларыңыз бен әріптестеріңіздің де денсаулығын ойласаңыз, үйде болып, оқшауланғаныңыз абзал.
Асылай ҚАДЫРҚЫЗЫ.
