Ақмола облысы бойынша Сыбайлас жемқорлыққа қарсы қызметінің басшылығы онлайн режимінде Ішкі мемлекеттік аудит аумақтық департаментінің өкілдерімен сыбайлас жемқорлықтың себептері мен жағдайларын қарау бойынша кездесу өткізді.
Қатысушыларға Қазақстан Республикасы Қылмыстық-процессуалдық Кодексінің 200-бабы негізінде енгізілген ұсыну шеңберінде мемлекеттік аудит органдары қызметкерінің тексеруді тиісінше ұйымдастырмау және жүргізу фактісі бойынша ақпарат жеткізілді.
Сыбайлас жемқорлыққа қарсы іс-қимыл департаментінің басшылығы атап өткеніндей, бұрын анықталған залалдың сомасын тергеу барысында растамағаны үшін мемлекеттік аудиторлық тексеру актілері негізінде тіркелген қылмыстық істердің бір бөлігі ақтайтын негіздер бойынша тоқтатылады.
–Қылмыстық процесте азаматтардың құқықтарын қорғауды күшейту мәселесі құқық қорғау органдарының ерекше бақылауында. Азаматтарды негізсіз қылмыстық қудалауға болмайды, өйткені, бұл адамдардың конституциялық құқықтары мен мүдделерін бұзады. Сондықтан, мемлекеттік аудиторлар тексерулерді жүзеге асыру кезінде жоғары кәсібилік, объективтілік және сатылмаушылық танытуы қажет, – деп атап өтті кездесу барысында облыстың Сыбайлас жемқорлыққа қарсы ведомствосының басшысы Мұрат Төлеубаев.
Сондай-ақ, ол сыбайлас жемқорлыққа қарсы іс-қимыл мәселелері бойынша заңнамадағы маңызды өзгерістерді түсіндірді. Алдағы уақытта осындай құқық бұзушылықтарға жол бермеу мақсатында Ішкі мемлекеттік аудит департаментінің басшылығына бағыныштылардың қызметіне тиісті бақылауды қамтамасыз ету, сондай-ақ ұжымға аудиторлық қорытындыларды сапасыз жасағаны үшін тиісті жауапкершілікке тарту туралы түсіндіру ұсынылды.
