Өңірлік коммуникациялар қызметінде өткен брифингте облыстық денсаулық сақтау басқармасының басшысы Нариман Сыздықов өңірімізде екпе егу бойынша ағымдағы жағдай туралы ақпарат берді.
Облысымызға үстіміздегі жылдың ақпан айынан бастап коронавирусқа қарсы екпелердің, атап айтсақ «Спутник-V», «Hayat Vax», «Kazvac», «СoronaVac» вакциналарының 280 790 дозасы әкелінген. Жоспар бо-йынша 411 мыңнан астам тұрғынға екпе салынуы керек.
Осы ретте, басқарма басшысының айтуынша, тәуелсіз әлеуметтік зерттеулердің нәтижесі сұралғандардың тең жартысының вакцинаның тиімділігіне сенбейтінін көрсеткен. Осы ретте, Нариман Ермекұлы вакцинаның індетті жеңудің ең тиімді жолы екенін тұрғындарға кеңінен түсіндіру қажеттігін айтты.
–Әлем болып күресіп жатқан індетті жеңудің жалғыз жолы – вакцинация. Бүгінде облысымызда вакцинацияға қатысты ақпараттық насихат жұмыстары жеткілікті жүргізілуде. Биылғы жылдың 1 ақпанынан бастап облыс бойынша 129272 адам екпенің бірінші компонентін алса, екпенің екінші компоненті егілгендердің, яғни, вирусқа қарсы иммундық қорғанысы бар адамдардың саны 72755-ті құрайды, – деген спикер өңір бойынша 131 екпе пункттері, 120 мобильді бригада жұмыс істейтінін айтты.
Сонымен қатар, вакцинациялауға 11 жылжымалы медициналық кешен жұмылдырылған.
Брифинг барысында басқарма басшысы коронавирус-пен ауыру деректері, дәрі-дәрмекпен қамтамасыз ету жұмыстары бойынша ақпарат берді.
Венера ТАЛҒАТҚЫЗЫ,
«Арқа ажарының» өз тілшісі.
Суретті түсірген Берік ЕСКЕНОВ.
