Қазақстан Республикасы Парламенті Сенатының депутаты Нұрлан Бекенов Ақмола облысының әкімі Ермек Маржықпаевпен бірге өңірдің су тасқыны қауіпі бар аумақтарды әуеден бақылап шықты.
Облыстық ішкі саясат басқармасының мәліметінше, ұшу маршруты Зеренді, Сандықтау, Атбасар, Астрахан, Бұланды және Бурабай аудандарын қамтыды. Əуеден неғұрлым осал учаскелер бақыланып, жалпы су тасқынына бағалау жүргiзiлдi.
Ал, Атбасар қаласында болғанында аймақ басшысы №1 шағынаудандағы 100 пәтерлі екі тұрғын үйдің құрылысымен танысты. Мұндағы құрылыс жұмыстарына республикалық бюджеттен 1,1 миллиард теңге қаржы бөлінген. Қаржының уақтылы бөлінуіне қарамастан құрылыс жұмыстары белгіленген кестеден қалуда. Осы ретте, аймақ басшысы тұрғын үй құрылысы және оның аумағындағы абаттандыру жұмыстарының қарқынын арттыруды тапсырды.
Атбасардағы №1 орта мектеп те қаупті аймақта орналасқан. Аймақ басшысы аталмыш мектепті ағын судан толық қорғау үшін бетоннан құйылған іргетасы бар тас қоршаудың жағдайына, теміржол көпірінің астындағы су құбырларының ағын суды өтізу мүмкіндігіне назар аударды.
«Өңірде су тасқынының қаупі әлі де бар. Әуеден бақылау кезінде байқанымыздай орман ішіндегі және су қоймаларындағы қар мен мұз әлі ери қойған жоқ. Бұл ағын су Шағалалы су қоймасына құйылып, Жабай өзенінің аңғарын лезде толтыруы мүмкін. Сол себепті, жергілікті атқарушы органдар мен Төтенше жағдайлар департаментінің күштері бірлесіп, өңірдегі барлық су қоймаларындағы судың деңгейін тәулік бойы бақылауы тиіс», – деп атап өтті Ермек Маржықпаев.
Жалпы, Ақмола облысында су тасқыны қаупін алдын алу мақсатында 14 аудандағы 53 елді мекенде қар тазалау, су сору, мұз жару, су арналары мен өзен аңғарларын тазалау сияқты іс-шаралары қолға алынды.
