– Бүгін Үкімет отырысында «Ауыл – ел бесігі» жобасына бөлінген қаржыны уақтылы игермеген өңірлер аталды, деп хабарлайды ҚазАқпарат тілшісі.
«Өткен жылы Ұлытау облысының Атасу, Бидайық, Бостұмсық және Сарысу ауылдарында медицина мекемелерінің құрылысына қажетті қаражат толығымен бөлінген болатын. Алайда, құрылыс жұмыстары әлі күнге дейін аяқталмаған.
СҚО-ның Мүсірепов атындағы ауданда ұзындығы 53,5 шақырым болатын жол құрылысы былтыр біту керек еді. Бірақ, жоспарланған көлемнен небәрі 26,5 шақырым жол пайдалануға берілген. Демек, жоспардың 50% әлі күнге орындалмай отыр», — деді Премьер-Министр Әлихан Смайылов Үкімет отырысында.
Министрлер кабинеті басшысының айтуынша, өңірлерде қаражатты тиімді пайдалану өте маңызды.
«Бір ауданда бірнеше жоба іске асырылып, басқа ауданда бірде-бір жоба іске асырылмайтын жағдайлар болмауы керек», — дейді ол.
Бұған дейін Премьер-Министр Әлихан Смайылов «Ауыл – ел бесігі» жобасына кейінгі үш жылда 326 млрд теңге, биыл 198 млрд теңге бөлінгенін айтқан еді.
