Азаматтық бастамаларды қолдау орталығы облыстық ішкі саясат басқармасымен бірлесіп, жергілікті атқарушы органдардың өкілдеріне 2023 жылға арналған гранттық жобаларды қаржыландыру бойынша енгізілген өзгерістерді түсіндіріп берді.
Азаматтық бастамаларды қолдау орталығы дегеніміз мемлекеттік және мемлекеттік емес гранттар беру арқылы үкіметтік емес ұйымдар мен бастамашыл топтарға өз идеяларын жүзеге асыруға көмектесетін ұйым. Бүгінде олар еліміздің 7 облысында грант беру бойынша жұмыстарын жүзеге асырып келеді. Биыл олар 100-ден аса жобаны грантпен қамтыпты.
Өткізілген жиынның мақсаты – жергілікті атқарушы органдар арасында заңнамаға енгізілген өзгертулер мен толықтыруларды ескере отырып, үкіметтік емес ұйымдарды гранттық қаржыландыру тетігін түсіндіру.
Облыстық ішкі саясат басқармасы басшысының орынбасары Жандәулет Қылышбаев мемлекеттік органдармен жұмыс істейтін бұл ұйымның ерекшелігіне назар аударып, атқарушы органдардың өкілдеріне жаңашылдықтың артықшылықтарына көңіл аударуды сұрады.
«Азаматтық бастамаларды қолдау орталығы» коммерциялық емес акционерлік қоғамының басқарма төрағасының орынбасары Арман Рақымжанов жиналған қауымға гранттық қаржыландырудың артықшылықтары туралы түсіндіріп берді. Оның айтуынша, елімізде үш қаржыландыру көзі бар екен. Мемлекеттік қаржыландыру, гранттық қаржыландыру, мемлекеттік әлеуметтік тапсырыстар мен сыйлықақылар, Жиында осы қаржыландыру тетіктері жан-жақты түсіндіріліп, атқарылған жұмыстар баяндалды.
Жиын соңында жергілікті атқарушы органдардың өкілдері түрлі сұрақтар қойып, өз ұсыныстарын да жеткізді.
«Арқа ажарының» өз ақпараты.
