Ақмола облысының әкімі Марат Ахметжанов Көкшетау қаласындағы «Bolashaq sarayi» балалар мен жасөспірімдер сарайында ұйымдастырылған Президент шыршасына қатысып құттықтау сөз сөйледі. Мерекелік шараға облыстың барлық аудандары мен қалаларынан келген 200 жуық бала қатысты.
Шарада облыс әкімі Марат Ахметжанов Мемлекет басшысының атынан бүлдіршіндерді алда келе жатқан Жаңа жыл мерекесімен құттықтады.
– Бүгін мемлекет сіздер үшін қажеттінің бәрін жасауда, жаңа мектептер салынуда, жақсы білім алу үшін жағдайлар жасалуда. Президент атап өткендей, «Егер балалар бақытты болса – бұл мемлекеттің болашағы зор екендігінің көрсеткіші». Біздің басты байлығымыз – сіздер», – деді құттықтау сөзінде аймақ басшысы.
Президент шыршасы – бала өміріндегі ең есте қаларлық және маңызды оқиғалардың бірі. Облыстың әр түкпіріндегі дарынды балалар мерекені тамашалай алды. Әсіресе, театрландырылған қойылым мен ертегі кейіпкерлері балалардың көңілінен шықты.
Шортанды ауданынан келген облыстық «Зерде» ғылыми жобалар байқауының жеңімпазы 12 жасар Әлжан Төлеген үшін шырша өмірдегі ең есте қаларлық және маңызды оқиғалардың біріне айналды.
– Маған шақырту жібергенде қатты қуандым. Өмірімдегі ең үлкен және ең маңызды оқиға болғандықтан ол менің жадымда ұзақ сақталатын болады. Бізге осындай қуаныш сыйлаған адамдарға үлкен алығысымды білдіреміз, – деді қатысушы.
Жаңа жылдық мерекелік бағдарлама театрландырылған қойылыммен және ертегі кейіпкерлерінің сүйемелдеуімен шыршаны жағумен жалғасты.
Мерекелік шараға келген балаларға Қазақстан Республикасының Президенті Қасым-Жомарт Тоқаевтың атынан 100 мың теңгеге ақшалай сертификаттар және тәтті сыйлықтар үлестірілді.
