Халықаралық ескерткіштер мен тарихи орындар күні 1983 жылдан бастап жыл сайын 18 сәуір күні атап өтіледі. Мерекені 1983 жылы ЮНЕСКО жанындағы Ескерткіштер мен көрнекті орындарды қорғау мәселелері жөніндегі Халықаралық кеңес Ассамблеясы белгілеген.
Оның басты мақсаты – тарихи ескерткіштерді сақтау және мәдени мұраны қорғау мәселелеріне қоғамның назарын аудару. Ескерткіштер – ел тарихы, адамзат өркениетінің құрамдас бөлігі. Ақмола облысы мәдениет басқармасының басшысы Айгүл Сәбитованың айтуынша халықаралық ескерткіштер мен тарихи орындар күні аясында аталмыш басқарманың бастамасымен өңірде онкүндіктен тұратын ауқымды іс-шаралар өтетін болады. Бұл – Ақмола облысының тарихи-мәдени мұра ескерткіштері мен киелі нысандарында «Бабалар ескерткіштері – ұрпаққа аманат» экологиялық акциясы, Біржан сал Қожағұлұлының 190 жылдығын атап өту жоспары да құрылып, іс-шаралар бекітілді, Сағадат Нұрмағамбетов пен Рахымжан Қошқарбаевтың 100 жылдықтарына арналған «Қазақ халқының қаһармандары» атты жалпыұлттық диктант, Әлкей Марғұланның 120 жылдығына арналған «Қазақ археологиясының атасы – Әлкей Марғұлан» республикалық ғылыми-практикалық конференциясы, дөңгелек үстел, тарих сабақтары, кездесу кештері және тағы басқалары осы онкүндіктің басты шаралары.
Биыл Кеңес Одағының Батыры, Халық Қаһарманы, тәуелсіз Қазақстанның тұңғыш Қорғаныс министрі, армия генералы Сағадат Нұрмағамбетовтың туғанына 100 жыл толады. Тәуелсіз Қазақстанның тұңғыш Қорғаныс министрі Сағадат Нұрмағамбетов пен Халық Қаһарманы Рахымжан Қошқарбаевтың есімдері биыл кеңінен ұлықталмақ. Ағымдағы жылдың мамыр айында Ақкөл қаласында батырдың құрметіне сквер ашылып, оның төріне биіктігі шамамен 6 метр болатын қола ескерткіш орнатылады. Мәдениет және ақпарат министрлігінің тапсырмасы бойынша түсірілген «Әскери ант» телехикаясы 7 мамырдан бастап көрерменге жол тартады. Сонымен қатар, С.Нұрмағамбетовтың үш кітабы қайта басылып шығады, – деді өз сөзінде Тарихи-мәдени мұраны қорғау және пайдалану орталығының директоры Жасұлан Үкеев.
Бүгінгі таңда облысымызда 1734 тарихи-мәдени ескерткіш мемлекет қорғауына алынған, оның ішінде 5 республикалық маңызы және жергілікті маңызы бар 1034 ескерткіш, сондай-ақ, 47 киелі нысан есепте тұр.
Салтанат ҚАЛҚАМАНҚЫЗЫ.
