Ақмола облысының кәсіпкерлер палатасы алаңында есірткінің таралуына қарсы күрес, есірткіні көлік-логистикалық компаниялар, ішкі және халықаралық тасымалдар арқылы жеткізу арналарын анықтау және жолын кесу мәселелері талқыланды. Іскерлік субъектілері, облыстық прокуратура, облыстық полиция департаменті өкілдерінің қатысуымен кездесу өзара іс-қимыл туралы жасалған меморандумдар шеңберінде өтті.
Күн тәртібіне қойылған басты мәселе – мүдделі тараптардың есірткі құралдары, соның ішінде оның синтетикалық түрлерінің таралуына қарсы күрестегі күш-жігерін біріктіру. Еске салсақ, осы жылдың 17 сәуірінде Қазақстан Республикасының Президенті Әкімшілігінің басшысы Айбек Дадебаевтың қатысуымен өткен кеңейтілген отырыста Бас прокуратура, ҰҚК, ІІМ, Қаржы мониторингі агенттігіне елдегі есірткі ахуалына талдау жүргізу туралы бірқатар тапсырма берілді. Оның негізінде осы саладағы күштік құрылымдардың қызметін бағалаудың бірыңғай жүйесін әзірлеу, жеткізу арналарын жою жөнінде шаралар қабылдау және кез келген жәрдемақыны қоса алғанда, есірткі құралдарын өткізу міндеті тұр.
–«Атамекен» ҰКП мамандары синтетикалық есірткі өндірісінде қолданылатын химиялық реагенттер, прекурсорлар мен жабдықтардың айналымын мемлекеттік бақылаудың тетігін әзірлеуді ұсынды. Бұл шаралар бақылаудағы тауарлардың қозғалысын қадағалауға мүмкіндік береді. Біз кездесуге көлік саласындағы қызметті жүзеге асыратын бизнес өкілдерін шақырдық. Жасыратыны жоқ, есірткі сатушылар көлік-логистикалық компаниялар, курьер қызметтерін пайдалана алады. Қойылған міндеттерді сапалы орындау, қауіпті заттардың заңсыз айналымына қарсы іс-қимыл мәселелерінде профилактикалық жұмысты күшейту мақсатында өзара іс-қимылдың бірлескен алгоритмін әзірлеу қажет, – деп атап өтті Өңірлік палата директоры Ерқанат Мұсылманбек.
Ақмола облысы полиция департаменті есірткі қылмысына қарсы іс-қимыл басқармасының бастығы Виталий Гудыменконың ақпараты бойынша, бүгінде есірткі құралдарының заңсыз айналымына байланысты 78 қылмыстық құқық бұзушылық анықталды. Соның ішінде 29 есірткі өткізу фактісі, аса ірі мөлшерде сақтау бойынша 9 факті, 36 есірткі қылмысы тіркелді. Жыл басынан бері «синтетиканың» 19 таратушысы ұсталды, облыс аумағына есірткі құралдарын жеткізудің 4 ірі арнасы таратылды. Спикер кәсіпкерлерді азаматтық позиция танытуға және күдік тудыратын барлық факті туралы полицияға хабарлауға шақырды.
–Көбінесе қажетті жабдықтар мен прекурсорлар шет елдерден логистикалық компаниялар арқылы жеткізіледі. Мысалы, 2023 жылдың тамыз айында Ерейментау ауданының аумағында Украина азаматы мен Молдавияның екі азаматы ұйымдастырған нарколабораторияның қызметі тоқтатылды. Полицияның жүргізген рейдтік іс-шаралары, жедел ақпарат жинау, тұрғындардың сауалнамасы көбінесе оң нәтиже бермейді. Алайда, күдікті жүктер мен оларды жіберетін және қарсы алатын адамдар туралы ақпаратты уақытылы алған жағдайда жүргізіліп жатқан жұмыстың тиімділігі едәуір артады, – деп атап өтті Виталий Гудыменко.
Ақмола облысы прокуратурасының жедел-іздестіру қызметін қадағалау басқармасының бастығы Арман Садыхановтың пікірінше, көбінесе логистер, көлік компаниялары, курьерлер жөнелтушіні де, адресатты да білмейді, тауардың ішіндегісі не тасымалданатыны және жеткізілетіні жайында да бейхабар. Сол арқылы есірткі сатушылардың қызметіне ықпал ететінін білмейді.
–Есірткі қылмысына қарсы іс-қимылды күшейту және оның зертханаларын анықтау мақсатында біз көлік-логистикалық компаниялардың құқық қорғау органдарына олардың заңдылығына күмән келтіретін күдікті жүктер туралы ақпарат беру, аталған қылмыстық қызметке қатысы бар барлық қатысушыны анықтау бойынша жан-жақты көмек көрсету қажеттілігі туралы ережені құжатқа енгізе отырып, меморандум жасауды ұсынамыз, – деп қосты өз сөзіне Арман Садыханов.
Айта кетейік, құқық қорғау органдары өз кезегінде бизнес субъектілеріне анонимділікті қамтамасыз етуге міндеттенеді. Сондай-ақ, кездесу барысында интернет-алаяқтықтың алдын алу мәселесі талқыланды. Ақмола облысы полиция департаменті криминалдық полиция басқармасының бөлім бастығы Ермек Манатов «Egov-mobile» қосымшасының көмегімен банктік қарыздар, микроқарыздар алудан ерікті түрде бас тарту мүмкіндігі туралы хабардар етті.
Кездесу соңында тараптар облыс аумағына есірткі құралдарының таралуына қарсы күресте күш біріктіруге мүмкіндік беретін тиісті меморандум құру туралы уағдаласты.
Өңірлік кәсіпкерлер палатасының баспасөз қызметі.
