Оқушыларды алқапты аумақтарға бейімдеу, экология мен өлкетануды зерттеуге баулу, туристік дағдыларды дамыту, туған өлкенің табиғатына ұқыпты қарауға тәрбиелеу мақсатында «Сырлы Сандықтау» далалық экспедициясы ұйымдастырылды.
Туризм, дене шынықтыру, алғашқы әскери және технологиялық дайындығы орталығы ағымдағы жылдың 26-28 маусым аралығында Балкашин ауылының «Қанағат» қонақ үйі-туристік кешенінің базасында аталмыш экспедицияны өткізді.
Шараға Атбасар, Зеренді, Сандықтау, Бурабай, Целиноград аудандары мен Көкшетау қаласынан бас-аяғы 40 оқушы қатысты. Экспедиция барысында Көкшетау қаласының С.Жүнісов атындағы №18 мектеп-лицейінің география пәні мұғалімі Мұрат Кәрімжанов «Vernier» құралдарының көмегімен судың және топырақтың сапасын қалай анықтауға болатынын көрсетті. Экспедиция қатысушылары «Қанағат» қонақ үй туристік кешенінің аумағындағы топырақтың сапасына зерттеу жүргізді, яғни оның ылғалдылығы, қышқылдығы, электрөткізгіштігі секілді қасиеттерін зерттеді. Ал, Целиноград ауданы Қажымұқан ауылының жалпы білім беретін мектебінің биология және география пәндерінің мұғалімі Ләззат Орынбекова өсімдік гормондары және ауксинді қолдану арқылы өсімдіктердің өсуіне зерттеу жүргізді. Балалар өздері өсімдіктің тұқымын ауксинмен және ауксинсіз пакеттерге салып, бірнеше күннен кейін зерттеу нәтижесін көрді.
Көкшетау қаласындағы Жоғары техникалық колледжінің әдіскері, арнайы пәндер оқытушысы Райхан Нарбаева оқушылармен егін алқаптарындағы топырақтың тығыздығы мен ылғалдылығын топырақ бұрғысының көмегімен анықтады. Егіндіктің арамшөптермен залалдануын анықтап, барлық жағдайды талдап, түсіндіріп берді.
– Оқушылар Сандықтау ауданының флорасы мен фаунасын қызығушылықпен зерттеп, экспедицияға белсенді қатысты. Сонымен қатар, олар бақылау күнделігін жүргізіп, гербарийлер жасады, жорықтардың сипаттамалары мен карталарын сызды, – дейді жоғарыда аталған колледж оқытушысы.
Сонымен қатар, далалық экспедициясының қатысушылары үшін «Экологиялық квест» өткізілді. Әр команда 5 станциядан өтіп, әр деңгейдегі тапсырмаларды маршруттық парақтар арқылы орындады.
Қорытындысы бойынша барлық қатысушыларға сертификат, ал, жетекшілеріне Ақмола облысы білім басқармасының Алғыс хаттары табыс етілді.
Ы.ШАМШИЕВА.
