Аудан орталығы Балкашино ауылындағы №1 мектептің түлегі Елена Габидулина жастайынан қазақтың ұлттық киімдері мен әшекейлерін тігуге машықтанған өнерлі қыз.
– Қазақтың сәндік-қолданбалы өнері мені өзіндік ерекшелігімен және сұлулығымен баурап алды. Мен осыған байланысты меткеп қабырғасында жүргенде екі зерттеу жобасын жаздым. Бірінші жұмысым заманауи бұйымдармен көрпе жасау және бұйым мотивтерін қолдануға арналған болса, екінші жобам сәукеле туралы. Өз жұмысымда осы бас киімнің сұлулығын жеткізуге тырыстым, сәукелені заманауи түрде жасап бас киімдегі бұрынғы кездің өзіндік ерекшелігін жеткізуге тырыстым. Осы жұмысыммен облыстық байқауда жүлделі үшінші орынға ие болдым», – дейді Елена.
Елена Габидулина бірінші сыныптан бастап оқу үздігі. Осынау «Менің ұлттық көйлек киген қуыршақтарым бірнеше рет ауданымыздың көркемөнерпаздар көрмелеріне қатысты. Мұғалімім Марина Бальденің жетекшілігімен көркем еңбек сабақтарында тігін дағдыларын үйрендім. Қазақтардың сәндік-қолданбалы өнерінің тарихын зерделеу маған бұйымдар жасауға шабыт береді. Бұл менің кішкентай хоббиім, оны әрі қарай жалғастыруды ойлаймын» деген жан толғанысы да жаныңды елжіретеді.
Тағы бір ерекше екпін түсіре атап өтерлігі, Елена бірнеше тілді меңгерген. Сонымен қатар, ол суретті де жақсы салады. Бейнелеу өнері бойынша бірнеше рет аудандық және облыстық байқаулардың жеңімпазы атанып отыр. Қазақтың төл өнерін насихаттап жүрген таудай талабы бар Еленаға өнерің өрге жүзсін дейміз біз де!
«Арқа ажарының» өз ақпараты.
Сандықтау ауданы.
