Жуырда «Достар» мәдениет сарайында жоғары оқу орындары мен техникалық және кәсіптік білім беретін оқу орындарының 1 курс студенттеріне арналған жыл сайынғы «Өз таңдауыңды жаса» тұсаукесер бағдарламасы ұйымдастырылды.
Шараны Ақмола облыстық жастар-ресурстық орталығы өткізді.Қазіргі уақытта облыс аумағында отызға жуықжастар бірлестіктері мен ұйымдары бар. Олар мазмұны жағынан әртүрлі болғанымен бір бағытта жұмыс істейді. Аталмыш іс-шара оқуға келген жастарға студенттік ортаға бейімделуге көмек көрсету шеңберінде іске асырылғанын айта кету керек.
Оған Ақмола облыстық «Думан» педагогикалық жасағы, «The Legacy Show» би студиясы, «Зерделі ұрпақ» жастар бірлестігі, «Молот» пікірсайыс клубы, «Доброе Сердце Lider.kz» қоғамдық қоры, «Aqmola Hub» өңірлік технопаркі және «Феникс» волонтерлік орталығымен тағы басқа ұйымдардың мүшелері ат салысты.
Шара барысында жастар ұйымдары өздерінің қызметтері жайлы ақпарат беріп, әрбір орталық пен ұйымның төрағалары жастарды бос уақытты тиімді пайдалануға шақырып, өздеріне ұйым мүшесі болып қабылданып, игі істерге үлес қосуға шақырды.
Өз сөзінде Ақмола облысы жастар-ресурстық орталығының басшысы Дастан Ермеков:
– Жас адам өзі өмірінде жүзеге асыруға, өзіндік құндылықтарды таңдап алуға көмектесетін ұстанымдарды таңдауы, сол жолдағы өз жолын анықтауы тиіс. Әр адам жеке әлеуетін, бойындағы қабілеттерін түзу іске асырып, қоғамның толыққанды мүшесі болғанда ғана азамат ретінде мұратына жетеді, – деп жастарды жарқын істерге құлшындыра түсті.
Кеш бойы жастардың қоғамдық бірлестіктері өздерінің атқаратын қызметтері туралы баяндап, жастардың қызығушылықтарын оятты. Шара соңында студенттер арнайы ұйымдастырылған концерттік бағдарламаны тамашалады.
«Арқа ажарының» өз ақпараты.
