Жуырда Астана қаласында «Бала шабыты» жобасының «Өнер планетасы» халықаралық байқауы өтті.
Жобаға Қазақстанның түкпір-түкпірінен 43 өнер ұжымы қатысты. Гүлишат Поплавскаяның жетекшілігімен Есіл қаласының «Star Studio» би тобы осы байқауға 3 би ұсынды.
–Тобымда бимен айналысып жүрген балалар Есіл қаласынан ғана емес, жақын жердегі ауылдардан да келіп шұғылданады. Бұл «Star Studio» би тобы 2021-ші жылы құрылған болатын. Міне, содан бері, шынымды айтсам, тек қана Гран-при немесе бірінші орын алып келеміз. Балалар мемлекеттік шығармашылық тапсырыс негізінде бимен тегін айналысады. Балалардың жас аралығы 4 жастан бастап 17 жасқа дейін. Есіл ауданына қарасты Игілік, Юбилейный, Победа, Курское ауылдарынан келетін балаларды ата-аналары ауа райының қолайсыздығына қарамастан әкеліп отыратыны қуантады. Балаларының дамып-жетілуіне үлес қосып келе жатқан ата-аналарға алғысым шексіз. Алар асуларымыз көп болсын, – деді өз сөзінде жетекшілері Гулишат Поплавская.
Сөйтіп, байқау қорытындысында аталған топ халық биі номинациясы бойынша жоғары марапатқа ие болды. Соның ішінде авар биі Гран-приді,қазақ биі мен өзбек биі 1-ші орындарды иемденді.
Олай болса, «Star Studio» би тобын лайықты жеңісімен құттықтай отырып, алдағы уақытта да шығармашылық табыстар мен жеңістер тілейміз.
Салтанат БӘКІРОВА,
«Арқа ажарының» өз тілшісі.
