Бұқпа тауындағы Мемлекеттік Ту тұғырында «Ақмола – нашақорлыққа қарсы өңір!» атты кең ауқымды автошеру бастау алып, Көкшетаудың басты көшелерімен жүріп өтті.
Оған ішкі саясат, білім, мәдениет, спорт басқармаларының, құқық қорғау органдарының, үкіметтік емес және жастар ұйымдарының өкілдері, спортшылар мен еріктілер қатысты.
Шеруге Көкшетау автоклубтарының мүшелері мен полиция департаментінің есірткі қылмысына қарсы күрес бөлімінің қызметкерлері де ат салысты. 30-дан астам автокөлік пен 20 мотоцикл патрульдік полиция бригадаларының сүйемелдеуімен ақмолалықтардың назарын нашақорлық мәселесіне аударып, салауатты өмір салтын ұстануға шақырды.
Акция жастар арасында есірткінің зияны туралы түсінік қалыптастыруға және салауатты әлеуметтік ортаны қалыптастыруға бағытталып, қатысушылар «есірткіге қарсы акция» өткізді. Ол символдық акциядан – психоактивті заттарды қолдануға және олардың қоғамға кері әсеріне наразылық білдіру мақсатында есірткі мен шприцтер бейнеленген плакаттарды жоюдан тұрды.
Акция барысында Ақмола облысының ішкі саясат басқармасының басшысы Алмас Алин сөз сөйлеп, нашақорлықпен күресудің маңыздылығын және бұл мәселені шешуге жастардың белсенді қатысып жатқанын баса айтып кетті.
Полиция департаментінің басшысы Нұрсұлтан Мұқашев өңірдегі есірткі қылмысының бүгінгі ахуалы туралы ақпарат беріп, бұл акцияның екінші кезеңі екенін, біріншісі ағымдағы жылдың қыркүйек айында өткенін атап өтті. Бірінші кезеңде полицейлер еріктілермен бірлесіп, дәріханалардың 300-ден астам жарнамасын және заңсыз мазмұндағы басқа да сілтемелерді жойды.
Облыс прокурорының орынбасары Ерболат Жүсіп өз сөзінде есірткі қылмысына қарсы күресте атқарылып жатқан шаралар мен мұндай шараларды өткізудің маңыздылығына назар аударды.
Акция аясында бірнеше іс-шаралар өткізілді, атап айтқанда, есірткіге қарсы күресте бірлік пен табандылықты бейнелейтін жастар флешмобы, автошеру, сонымен қатар, нашақорлықтың алдын алу және жастарды есірткі бизнесіне тарту бойынша ақпараттық буклеттер таратылды.
Облыс орталығында өткен шара қала көшелерімен Мемлекеттік тулар ілінген автошерумен аяқталды және осындай акцияларды өткізу үшін Бурабай және Зеренді аудандарына акция вымпелі тапсырылды. Есірткіге қарсы челлендж әрі қарай облыстың барлық аймақтарында өтеді.
Салтанат БӘКІРОВА,
«Арқа ажарының» өз тілшісі.
