Мемлекет басшысы Қасым-Жомарт Тоқаев ауыл шаруашылығы қызметкерлерінің бірінші форумында жаһандану дәуіріндегі ауылдардың маңызы туралы ой қозғады. Оның ауыл шаруашылығы, тамақ және қайта өңдеу өнеркәсібі қызметкерлері күні қарсаңында өткені қуантады. Іс-шара тағы бір айтулы оқиғамен, Қазақстанда тың жерлерді игерудің басталуының 70 жылдығымен тұспа-тұс келді.
Форумда Президент бүгінде агроөнеркәсіптік кешенге жан-жақты қолдау көрсетілетінін атап өтті. Мемлекеттік саясаттың басты мақсаты – ауыл шаруашылығының дамуына жаңа серпін беру.
Президент айтқанындай, ауыл – бәріміздің алтын бесігіміз. Бұл сөз өте маңызды және терең мағынаға ие. Ауыл қазақ халқының түп қазығы, оның тарихы мен мәдениетінің негізі болып табылады. Ауылдың дамуы мен оның болашағы – тұтас елдің болашағы. Мықты мемлекет болу үшін ауылды дамыту, оның әлеуетін арттыру өте маңызды. Осы мақсатқа әрбір азаматтың өз үлесін қосуы керек.
Ауылда туып-өскен жастар, ауылдың мәдениеті мен дәстүрін ұстанатын адамдар болашақта қоғамда үлкен өзгерістер жасап, еліміздің дамуына әсер ететіні сөзсіз. Ауылда тұрған кезде, адамдар өздерінің түп-тамырын сезініп, ұлттық құндылықтарды сақтап, солардың негізінде өмір сүреді.
Жаһандану заманында, технологиялар мен ғаламтор дамыған сайын ауылдар да дамуға тиіс. Ол үшін заманауи инфрақұрылым, білім беру, денсаулық сақтау жүйесін жақсарту, ауыл шаруашылығын қолдау, кәсіпкерлікті дамыту сияқты жұмыстар атқарылуы керек. Ауыл тұрғындарына тұрақты жұмыс орындары мен әлеуметтік қолдау көрсету арқылы ауылдың дамуында ілгерілеу болуы мүмкін.
Мемлекет басшысы атап көрсеткеніндей, ауылды сақтау және дамыту – қазақ халқының мәдениеті мен болашағын сақтап қалу үшін маңызды қадам болып табылады. Ауылдың дамуы – әрбіріміздің ортақ ісіміз.
Оралбек БЕКІШЕВ,
Зеренді аудандық ардагерлер кеңесінің төрағасы,
«Обама» ауыл шаруашылығы саласы бойынша серіктестігінің басшысы.
