Ақмола студенттері «WorldSkills Kazakhstan 2024» ұлттық кәсіби шеберлік чемпионатында 7 жүлделі орын мен 11 кемелдік медальонына ие болды.
«WorldSkills Kazakhstan 2024» жұмысшы кәсіптерінің ІХ чемпионатында Ақмола облысының командасы 2 алтын, 1 күміс және 4 қола медальді еншілеп, қанжығаларын майлап қайтты.
Үш күнге созылған конкурс «ЭКСПО» халықаралық көрме орталығының аумағында өтті. Еліміздің колледж студенттері білім алып жүрген құзыреттіліктер бойынша өздерінің дағдылары мен машықтарын ортаға салып, бақ сынады. 32 студенттен құрылған Ақмола командасы конкурста ұсынылған барлық 30 құзырет бойынша сынға түсті.
Ел жастары арасында өткен Ұлттық жұмысшылар чемпионатының салтанатты жабылуы Астанадағы Роза Бағланова атындағы «Қазақконцерт» концерт залында аяқталды.
Республикалық чемпионаттың қорытындысы бойынша Көкшетау қаласының жоғары техникалық колледжінің екі студенті – Қожахмет Әділет пен Мацегора Сергей «Мобильді робототехника», сондай-ақ, Степногорск қаласының жоғары колледжінің студенті Меруерт Хамзина «Визуалды мерчендайзинг және витринистика» құзыреттері бойынша чемпионаттың жеңімпаздары атанды.
Ал, Көкшетау қаласының жоғары техникалық колледжінің білім алушысы Ильяс Гатин «Мобильдік қосымшаларды әзірлеу» құзыреті бойынша екінші орыннан көрінді. Сонымен бірге, Шағалалы ауылындағы жоғары агротехникалық колледжінің студенті Қабибола Еламан «Өнеркәсіптік автоматика», Щучинск қаласының жоғары техникалық колледжінің студенті Беленец Каролина «Кондитерлік іс», Көкшетау қаласының жоғары техникалық колледжінің студенттері Червоняк Нина, Абраев Артур және Дьяченко Олег «Кескіндеме және сәндік жұмыстар», «Мехатроника» құзыреттіліктері бойынша жүлделі үшінші орындарды бағындырды.
Сондай-ақ, біздің қатысушылар әртүрлі құзыреттіліктер бойынша 11 медальонмен марапатталды. Мұндай марапат өз құзыретінде халықаралық стандартқа қол жеткізген, бірақ, жүлделі орынға бағалары сәл жетпеген мамандарға беріледі.
Естеріңізге сала кетейік, ағымдағы жылы чемпионатқа 22 жасқа дейінгі 555 жас маман – WorldSkills өңірлік чемпионаттарының жеңімпаздары жиналды.
Қ.САТКЕН.
