Қосшы қаласында газдандыру бойынша ауқымды жоба басталды. Бұл жоба энергетикалық инфрақұрылымды түбегейлі өзгертеді және тұрғындардың өмір сапасын арттырады деп күтілуде. 2024–2026 жылдар аралығында жүзеге асырылатын 11,3 миллиард теңге сомасындағы жобаның жұмысын «Алия-Сервис» ЖШС жүргізуде. Қазіргі уақытта компания газ құбыры мен газ тарату желілерін салуға кірісіп, жұмыс кезең-кезеңімен атқарылып жатыр.
Жоба аясында жалпы ұзындығы 408,7 шақырым газ құбырларынан тұратын кешенді жүйе құрылмақ. Бұл жүйеге 2 шақырым жоғары қысымды газ құбыры, 38,8 шақырым ішкі аула газ құбырлары, 367,9 шақырым төмен қысымды газ құбырлары кіреді. Сонымен қатар, 43 шкафты және 1 блокты газ реттегіш пунктін орнату жоспарланған.
Жоба аясында шамамен 15 мың абонентті газбен қамту көзделуде, бұл Қосшы қаласының даму жоспарына кіреді.
Осы жылға арналған жобаны жүзеге асыру үшін «Самұрық-Қазына» АҚ қорынан 4 миллиард теңге бөлінген. Қазіргі уақытта құрылыс жұмыстары жоспарға сәйкес жүргізілуде, газ құбырларының 51,4 шақырымы төселді.
Қазіргі уақытта нысанда 58 маман еңбек етуде.
Қосшы қаласын газдандыру – бұл тұрғындардың тұрмыстық жағдайларын жақсартумен қатар, қала инфрақұрылымының дамуына жаңа серпін береді. Жобаның жүзеге асырылуы энергия тиімділігін арттыруға, экологиялық қауіпсіздікті қамтамасыз етуге, көмірқышқыл газының шығарындыларын азайтуға және инвестициялар тарту мүмкіндіктерін арттыруға ықпал етеді.
Бұл бастама Қосшы қаласының жайлы әрі заманауи қала ортасын құрудағы маңызды қадам болып табылады және қала дамуының ұзақ мерзімді тұрақтылығын қамтамасыз етуде үлкен рөл атқарады.
